അച്ഛനമ്മമാർ എപ്പോഴെങ്കിലുമൊക്കെ മക്കളെ അവരുടെ ജോലി സ്ഥലത്ത് കൊണ്ടുപോയിട്ടുണ്ടാകും. എന്നാൽ മക്കൾ തിരിച്ച് ഇതുപോലെ ചെയ്താൽ രസമായിരിക്കും അല്ലേ. മക്കൾ ജോലി ചെയ്യുന്ന സ്ഥലത്തേക്ക് അച്ഛനെയും അമ്മയേയും കൊണ്ടുവന്നൊരു വീഡിയോ ആണിപ്പോൾ സോഷ്യൽ മീഡിയയിൽ വൈറലാകുന്നത്.
ബിനിത കർക്കി എന്ന യുവതിയാണ് തന്റെ ജോലി സ്ഥലവും അവിടെയുള്ള വിനോദ സഞ്ചാര കേന്ദ്രങ്ങളും കാണാനായി തന്റെ അമ്മയെ കൊണ്ട്പോയത്. അമ്മയ്ക്ക് കാണണമെന്ന് ആഗ്രഹഹമുള്ള ബുർജ് ഖലീഫയും കൊണ്ടുപോയി കാണിച്ചു. ഇതിന്റെ വീഡിയോ യുവതി സോഷ്യൽ മീഡിയയിൽ പങ്കുവച്ചു. വീഡിയോയിൽ ബിനിതയുടെ അമ്മ പരമ്പരാഗത സാരി ധരിച്ച് ബുർജ് ഖലീഫയുടെ പരിസരത്ത് ചുറ്റിനടക്കുന്നത് കാണാം.
ദുബായ് നഗരമധ്യത്തിന്റെ ആഡംബരങ്ങളെ അതിശയത്തോടെ നോക്കി കാണുന്ന അമ്മയുടെ വീഡിയോ ആളുകൾ ഏറ്റെടുത്തു. ‘നിങ്ങളുടെ അമ്മ ലോകത്തിലെ ഏറ്റവും ഉയരം കൂടിയ ടവറിൽ കയറി, നിങ്ങളാണ് അത് സാധ്യമാക്കിയത്’ എന്ന കുറിപ്പോടെയാണ് ബിനിത കർക്കി വീഡിയോ പങ്കുവച്ചത്.
വീഡിയോ വൈറലായതോടെ യുവതിയെ പ്രശംസിച്ച് നിരവധി ആളുകൾ കമന്റ് ചെയ്തു. മക്കളായാൽ ഇങ്ങനെ വേണമെന്നാണ് പലരും പറഞ്ഞത്.
