തുമ്മൽ പിടിച്ച് വയ്ക്കരുത് അത് തുമ്മിത്തന്നെ തീർക്കണമെന്നാണ് പൊതുവെ പറയുന്നത്. പല ശബ്ദത്തിലും പല രീതിയിലുമൊക്കെയാണ് എല്ലാ മനുഷ്യരും തുമ്മുന്നത്. നിങ്ങളുടെ തുമ്മൽ നിങ്ങൾ ഏത് നാട്ടിൽ ഉള്ളവരാണെന്ന് അറിയാൻ സാധിക്കുമെന്നാണ് സോഷ്യൽ മീഡിയയിൽ പ്രചരിക്കുന്നത്. ഇതിന്റെ വീഡിയോ ഇപ്പോൾ ട്രെന്ഡിംഗിലാണ്.
അമേരിക്ക, ഇന്ത്യ എന്നിവിടങ്ങളിൽ പൊതുവെ “അച്ചൂ” (Achoo) എന്ന ശബ്ദമാണ് കേൾക്കാറുള്ളതെന്നാണ് വീഡിയോയിൽ പറയുന്നത്. ഇന്ത്യക്കാർക്ക് ഏറെ പരിചിതമായ ശബ്ദമാണിത്. ജർമ്മനിക്കാർ തുമ്മുമ്പോൾ “ഹാച്ചി” (Hatchi) എന്നാണ് ശബ്ദമുണ്ടാക്കുന്നത്.
ഫ്രഞ്ചുകാർ തുമ്മലിന്റെ അവസാനം ഒരു ‘M’ കൂടി ചേർത്ത് “അച്ചൂം” (Atchoom) എന്ന് ഉച്ചരിക്കുന്നു. പോളണ്ടിൽ തുമ്മൽ ശബ്ദം അല്പം കൂടി കടുപ്പമേറിയ “അപ്സിക്” (Apsik) എന്നാണ്. ജപ്പാനിലുള്ളവർ “ഹക്കുഷോൺ” (Hakushon) എന്ന ശബ്ദത്തിലാണ് തുമ്മാറുള്ളതെന്നും വീഡിയോ അവകാശപ്പെടുന്നു.
എന്നാൽ നമ്മൾ കൈകാര്യം ചെയ്യുന്ന ഭാഷ കേൾക്കുന്ന ശബ്ദങ്ങൾ എന്നിവ അനുസരിച്ചാണ് ഓരോ ആളുകളും തുമ്മുന്നത് എന്നാണ് വിദഗ്ധർ പറയുന്നത്. ജന്മനാ കേൾവി ശക്തിയില്ലാത്തവർ തുമ്മുമ്പോൾ സാധാരണയായി ഇത്തരം ശബ്ദങ്ങൾ പുറപ്പെടുവിക്കാറില്ല. ചുറ്റുമുള്ളവർ ഉണ്ടാക്കുന്ന ശബ്ദം കേട്ടു ശീലിക്കാത്തതിനാലാണിത്.
