ആകാശ എയർ വിമാനത്തിൽ മുംബൈയിലെത്തിയ യാത്രക്കാരന്റെ ലഗേജ് കേടുപാടുകളോടെ ലഭിച്ചു. ബാഗിന്‍റെ വീൽ തകർന്നതിനൊപ്പം ചുറ്റുമുള്ള ഭാഗവും കീറിയ നിലയിലായിരുന്നു. എന്നാൽ പ്രശ്നം പരാതിപ്പെട്ടപ്പോൾ ഗ്രൗണ്ട് ജീവനക്കാരുടെ ഭാഗത്തുനിന്നും ഉണ്ടായ നിരുത്തരവാദപരമായ പ്രതികരണമാണ് യാത്രക്കാരനെ കൂടുതൽ പ്രകോപിപ്പിച്ചത്.
ഈ സംഭവത്തിന്‍റെ വീഡിയോ എക്സ് ഉപയോക്താവായ വിശാൽ എം. യാദവ് ആണ് സമൂഹമാധ്യമങ്ങളിൽ പങ്കുവെച്ചത്. ബാഗിന്‍റെ തകർന്ന ഭാഗം കാണിച്ചുകൊണ്ട് യാത്രക്കാരൻ ജീവനക്കാരുമായി സംസാരിക്കുന്നതാണ് വീഡിയോയിലുള്ളത്.
“ഇതു നോക്കൂ, ഈ ബാഗ് ഈ ഭാഗത്ത് പൂർണമായും തകർന്നിരിക്കുന്നു. ഞാൻ ജീവനക്കാരോട് ചോദിച്ചപ്പോൾ, ബാഗ് കേടായതായി തോന്നുന്നില്ലെന്നാണ് അവർ പറഞ്ഞത്. ഞാൻ ഇപ്പോൾ തന്നെ ഓൺലൈനായി പരാതി നൽകും” എന്ന് യാത്രക്കാരൻ വീഡിയോയിൽ വ്യക്തമാക്കുന്നുണ്ട്.
ലഗേജുകൾ കൈകാര്യം ചെയ്യുന്നതിലെ അശ്രദ്ധയ്ക്കും യാത്രക്കാരോട് മോശമായി പെരുമാറുന്ന ജീവനക്കാരുടെ നടപടിക്കും എതിരെ വ്യാപകമായ വിമർശനമാണ് സമൂഹമാധ്യമങ്ങളിൽ ഉയരുന്നത്. എയർലൈൻ അധികൃതർ ഇതിന്മേൽ ഔദ്യോഗികമായി പ്രതികരിച്ചിട്ടില്ല.
