സ്പാനിഷ് ഫുട്ബോൾ വണ്ടർകിഡ് ലമീൻ യമാലിനോട് വിസ്മയിപ്പിക്കുന്ന മുഖസാദൃശ്യമുള്ള മലയാളി കൗമാരക്കാരൻ സോഷ്യൽ മീഡിയയിൽ വൈറലാകുന്നു. കൊല്ലം ചക്കുവള്ളി സ്വദേശിയും പെരുവഴി ഗവ. ഹൈസ്കൂളിലെ പത്താം ക്ലാസ് വിദ്യാർഥിയുമായ അലൻ ജെയിംസാണ് ഒറ്റരാത്രികൊണ്ട് നാടിന്റെയും സോഷ്യൽ മീഡിയയുടെയും താരമായി മാറിയത്.
ബ്ലോക്ക് പഞ്ചായത്ത് അംഗവും വ്ലോഗറുമായ നിഖിൽ മനോഹർ അലന്റെ വീഡിയോ ഇൻസ്റ്റാഗ്രാമിൽ പങ്കുവെച്ചതോടെയാണ് സംഭവം ശ്രദ്ധ നേടുന്നത്. നിമിഷനേരം കൊണ്ട് തരംഗമായ വീഡിയോ ഇതിനോടകം 1.4 കോടിയിലധികം ആളുകളാണ് കണ്ടത്. യമാലിന്റെ അതേ ഹെയർസ്റ്റൈലും ചിരിയും മുഖഭാവങ്ങളുമാണ് അലനെ വേറിട്ടുനിർത്തുന്നത്.
വീഡിയോ വൈറലാകുന്നതിന് മുൻപ് വെറും 200 ഫോളോവേഴ്സ് മാത്രം ഉണ്ടായിരുന്ന അലന്റെ ഇൻസ്റ്റാഗ്രാം അക്കൗണ്ടിൽ ഇപ്പോൾ 20,000ത്തിലധികം ഫോളോവേഴ്സുണ്ട്. യമാലിനെപ്പോലെ തന്നെ അലനും ഫുട്ബോൾ കളിക്കാരനാണ്. പെരുവഴി സ്കൂൾ ടീമിലെ പ്രതിരോധ നിരയിലാണ് അലൻ കളിക്കുന്നത്.
യമാലുമായി സാദൃശ്യമുണ്ടെങ്കിലും അർജന്റീനയുടെ സൂപ്പർ താരം ലയണൽ മെസ്സിയാണ് തന്റെ എക്കാലത്തെയും പ്രിയപ്പെട്ട കളിക്കാരനെന്ന് അലൻ പറയുന്നു.
സോഷ്യൽ മീഡിയയിൽ വൈറലായതോടെ പ്രാദേശിക പരിപാടികളിൽ അതിഥിയായി അലന് ക്ഷണങ്ങൾ ലഭിച്ചുതുടങ്ങിയിട്ടുണ്ട്. ഫുട്ബോൾ താരം ലമീൻ യമാലിൽ നിന്ന് ഒരു സന്ദേശമെങ്കിലും നേരിട്ട് ലഭിക്കണമെന്നാണ് ഈ കൊല്ലംകാരൻ കൗമാരക്കാരന്റെ ഇപ്പോഴത്തെ ഏറ്റവും വലിയ ആഗ്രഹം.
