ഓൺലൈൻ ഷോപ്പിംഗിൽ വൻ തട്ടിപ്പിനിരയായി ഉത്തർപ്രദേശിലെ ഗ്രേറ്റർ നോയിഡ സ്വദേശി. സ്വന്തം ആവശ്യത്തിനായി ഓൺലൈനായി ഓർഡർ ചെയ്ത ആൻഡ്രോയിഡ് ഡിവൈസിന് (ഫോൺ/ടാബ്ലെറ്റ്) പകരം യുവാവിന് കൊറിയറിൽ ലഭിച്ചത് ചാണകം. ഗ്രേറ്റർ നോയിഡയിലെ ദങ്കൗർ പോലീസ് സ്റ്റേഷൻ പരിധിയിൽ താമസിക്കുന്ന ആകാശ് നഗർ എന്ന യുവാവാണ് ഇത്തരത്തിൽ വഞ്ചിക്കപ്പെട്ടത്.
ഏാനും ദിവസങ്ങൾക്ക് മുമ്പാണ് ഇയാൾ ഒരു വെബ്സൈറ്റ് വഴി ഉപകരണം ഓർഡർ ചെയ്തത്. ഓർഡർ ചെയ്യുന്ന സമയത്ത് തന്നെ തുക മുഴുവനായും ഡിജിറ്റലായി അടയ്ക്കുകയും ചെയ്തിരുന്നു. തിങ്കളാഴ്ച വൈകുന്നേരം 5 മണിയോടെ കൊറിയർ വഴി പാർസൽ വീട്ടിലെത്തി. എന്നാൽ ആവേശത്തോടെ പെട്ടി തുറന്നുനോക്കിയ ആകാശ് കണ്ടത് ആൻഡ്രോയിഡ് ഉപകരണത്തിന് പകരം ഉണങ്ങിയ ചാണകമായിരുന്നു.
വഞ്ചിക്കപ്പെട്ട വിവരം മനസ്സിലായതോടെ യുവാവ് പ്രദേശത്തെ പോലീസ് സ്റ്റേഷനിൽ പരാതി നൽകി. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്. യുവാവ് സാധനം ഓർഡർ ചെയ്ത വെബ്സൈറ്റ്, പണമിടപാട് വിവരങ്ങൾ, കൊറിയർ വിതരണ ശൃംഖല എന്നിവ കേന്ദ്രീകരിച്ചാണ് അന്വേഷണം നടക്കുന്നത്. അന്വേഷണത്തിന് ശേഷം കുറ്റക്കാർക്കെതിരെ കർശന നടപടി സ്വീകരിക്കുമെന്ന് പോലീസ് അറിയിച്ചു.
അതേസമയം, അപരിചിതമായ വെബ്സൈറ്റുകളിൽ നിന്നോ തേർഡ് പാർട്ടി സെല്ലർമാരിൽ നിന്നോ ഓൺലൈൻ ഷോപ്പിംഗ് നടത്തുമ്പോൾ ജാഗ്രത പാലിക്കണമെന്ന് സൈബർ സുരക്ഷാ വിദഗ്ധർ മുന്നറിയിപ്പ് നൽകുന്നു.
