ചെന്നൈ: ബംഗാൾ ഉൾക്കടലിൽ അതിതീവ്ര ന്യൂനമർദമായി രൂപംകൊണ്ട ദിത്വ ചുഴലിക്കാറ്റ് വടക്കൻ തമിഴ്നാട്, പുതുച്ചേരി, തെക്കൻ ആന്ധ്ര തീരങ്ങളിലേക്കടുക്കുന്നതായി കാലാവസ്ഥാ നിരീക്ഷണ കേന്ദ്രം അറിയിച്ചു.
ഈ പ്രദേശങ്ങളിൽ ഇന്നുമുതൽ ആറുദിവസത്തേക്ക് ഇടിയോടുകൂടിയ ശക്തമായ മഴയ്ക്കു സാധ്യത. തമിഴ്നാടിന്‍റെ തെക്കൻ ജില്ലകളിൽ റെഡ് അലർട്ട് പ്രഖ്യാപിച്ചു. ഡിസംബർ രണ്ടുവരെ ആരും കടലിലിറങ്ങരുതെന്ന് മത്സ്യത്തൊഴിലാളികൾക്കു നിർദേശമുണ്ട്.
ചുഴലിക്കാറ്റിനെത്തുടർന്ന് കേരള- ലക്ഷദ്വീപ് തീരങ്ങളിൽ ഇന്നും നാളെയും മത്സ്യബന്ധനത്തിന് വിലക്കും ഏർപ്പെടുത്തിയിട്ടുണ്ടെന്നും കാലാവസ്ഥാവകുപ്പ് അറിയിച്ചു. ചെന്നൈ വിമാനത്താവളത്തിലെ 54 വിമാന സർവീസുകൾ മുൻകരുതൽ നടപടിയായി റദ്ദാക്കിയതായി അധികൃതർ അറിയിച്ചു.
മധുര, തിരുച്ചിറപ്പള്ളി, തൂത്തുക്കുടി, സേലം, ബംഗളൂരു, ഹൈദരാബാദ്, ശ്രീലങ്ക-ജാഫ്ന എന്നിവിടങ്ങളിലേക്കുള്ള സർവീസുകൾ ഉൾപ്പെടെയാണ് റദ്ദാക്കിയത്. തൂത്തുക്കുടി, ട്രിച്ചി, മധുര എന്നിവിടങ്ങളിലേക്കുള്ള എല്ലാ വിമാന സർവീസുകളും റദ്ദാക്കിയതായി ഇൻഡിഗോ എയർലൈൻസ് അറിയിച്ചു. സർവീസുമായി ബന്ധപ്പെട്ട വിവരങ്ങൾ അറിയിക്കുമെന്നും കന്പനി അധികൃതർ അറിയിച്ചു.
ചുഴലിക്കാറ്റിന്‍റെ പശ്ചാത്തലത്തിൽ സംസ്ഥാനത്തെ എല്ലാ സ്കൂളുകൾക്കും തമിഴ്നാട് സർക്കാർ അവധി പ്രഖ്യാപിച്ചു. പുതുച്ചേരിയിലും വിദ്യാഭ്യാസസ്ഥാപനങ്ങൾക്ക് അവധി പ്രഖ്യാപിച്ചിട്ടുണ്ട്.
നിലവിൽ ചുഴലിക്കാറ്റ് ട്രിങ്കോമാലി, ബട്ടിക്കലോവ എന്നിവിടങ്ങളോട് ചേർന്നാണുള്ളത്. വടക്കൻ തമിഴ്നാട്, പുതുച്ചേരി, തെക്കൻ ആന്ധ്രാപ്രദേശ് തീരത്തേക്കു നാളെ പ്രവേശിക്കുമെന്നാണ് കാലാവസ്ഥാവകുപ്പിന്‍റെ മുന്നറിയിപ്പ്.
തമിഴ്നാട്, ആന്ധ്ര സർക്കാരുകൾ ദുരിതാശ്വാസ ക്യാന്പുകൾ തുറന്നിട്ടുണ്ട്. 24 മണിക്കൂറും പ്രവർത്തിക്കുന്ന കൺട്രോൾ റൂമും സജ്ജമാണ്. അതേസമയം, ശ്രീലങ്കയിൽ ദിവസങ്ങളായി തുടരുന്ന മഴയിലും പ്രകൃതിക്ഷേഭത്തിലും എഴുപതിലേറെപ്പേർ മരിച്ചെന്നാണ് റിപ്പോർട്ട്. നിരവധിപ്പേരെ കാണാതായിട്ടുണ്ട്.
