വളർത്തുമൃഗങ്ങളെ വീട്ടിലെ ഒരു അംഗത്തെപ്പോലെ സ്നേഹിക്കുന്ന ആളുകളാണ് മിക്കവരും. എന്നാൽ അങ്ങനെ അല്ലാത്തവരും ഉണ്ട്. അതി തെളിയിക്കുന്നൊരു വീഡിയോ ആണിപ്പോൾ സോഷ്യൽ മീഡിയയിൽ വൈറലാകുന്നത്. കോൽക്കത്തയിലെ കല്യാണി എക്സ്പ്രസ് വേയിൽ നിന്നുള്ളതാണ് വീഡിയോ.
ഒരു നായയെ ഓടുന്ന ബൈക്കിനോട് ചേർത്ത് കെട്ടിയിട്ട് അതിവേഗം ഓടാൻ നിർബന്ധിക്കുന്ന ദാരുണമായ ദൃശ്യങ്ങൾ പകർത്തിയതാണ് വീഡിയോ. ഒരു പുരുഷൻ ബൈക്ക് ഓടിക്കുന്നു അയാൾക്കൊപ്പം പിൻസീറ്റിൽ ഒരു സ്ത്രീ യാത്ര ചെയ്യുന്നു. എന്നാൽ, ഇതിനോടൊപ്പം ബൈക്കിന്റെ ഒരു വശത്തായി ഒരു നായയുടെ കഴുത്തിൽ ബെൽറ്റ് ഇട്ട് കെട്ടിയിരിക്കുന്നു, വേഗത്തിൽ പോകുന്ന ബൈക്കിനൊപ്പം ഓടാൻ നായയെ ഇവർ നിർബന്ധിക്കുന്നതാണ് വീഡിയോ.
വീഡിയോ വൈറലായതോടെ നിരവധി ആളുകളാണ് കമന്റുമായി എത്തിയത്. കണ്ണിൽ ചോര ഇല്ലാത്തവരാണോ ഇവരെന്നാണ് മിക്കവരും ചോദിച്ചത്. മൃഗങ്ങൾക്ക് വേണ്ടി ശബ്ദം ഉയർത്തുന്നവരൊന്നും ഈ കാഴ്ച കാണുന്നില്ലേ. മിണ്ടാപ്രാണിയോട് എന്തിനീ ക്രൂരത എന്നു തുടങ്ങുന്നു ആളുകളുടെ രോക്ഷം.
