ടെസ്ല സിഇഒ ഇലോൺ മസ്കുമായി താൻ ഒരു കുഞ്ഞിന് ജന്മം നല്കാൻ ഉണ്ടായ കാരണം വെളിപ്പെടുത്തി എഴുത്തുകാരിയും ഇൻഫ്ലുവൻസറുമായ ആഷ്ലി സെന്റ് ക്ലെയർ. സാമ്പത്തിക സുരക്ഷിതത്വവും കൂടുതൽ കുട്ടികൾ വേണമെന്ന ആഗ്രഹവുമാണ് തന്നെ ഈ തീരുമാനത്തിലേക്ക് നയിച്ചതെന്നാണ് ആഷ്ലി വ്യക്തമാക്കുന്നത്.
ഇലോൺ മസ്കുമായുള്ള ബന്ധത്തെക്കുറിച്ചും കുഞ്ഞിനെക്കുറിച്ചും തുറന്നുപറഞ്ഞപ്പോൾ സാമ്പത്തിക സുരക്ഷിതത്വത്തെക്കുറിച്ചുള്ള തന്റെ ആശങ്കകളാണ് ഇതിന് പ്രധാനകാരണമെന്നും ആഷ്ലി പറയുന്നു.
കുട്ടികളുടെ ബില്ലുകൾ അടയ്ക്കാൻ കഴിയുമോ എന്ന് ആകുലപ്പെടാതെ, താൻ എപ്പോഴും ആഗ്രഹിച്ചതുപോലെ ഒരു അമ്മയാകാൻ വേണ്ടിയാണ് ഇലോൺ മസ്കുമായി കുഞ്ഞ് എന്ന തീരുമാനത്തിലേക്ക് എത്തിയതെന്ന് അവർ വ്യക്തമാക്കി. തന്റെ ഗർഭകാലത്തും പ്രസവത്തിനുശേഷവും കാര്യങ്ങൾ ഏറെക്കാലം രഹസ്യമായി സൂക്ഷിക്കാൻ താൻ നിർബന്ധിതയായിരുന്നുവെന്നും, എന്നാൽ ടാബ്ലോയ്ഡ് മാധ്യമങ്ങൾ വാർത്ത പുറത്തുവിട്ടതോടെ സത്യം വെളിപ്പെടുത്താൻ താൻ തയ്യാറാകുകയായിരുന്നുവെന്നും അവർ വ്യക്തമാക്കി.
ഈ വിഷയത്തിൽ ഇലോൺ മസ്ക് $2.5 മില്യൺ (ഏകദേശം 20 കോടി രൂപയിലേറെ) താൻ നൽകിയിട്ടുണ്ടെന്ന് അവകാശപ്പെട്ടപ്പോൾ, കുഞ്ഞിന്റെ പിതൃത്വത്തെക്കുറിച്ച് തനിക്ക് ഉറപ്പില്ലെന്നും അദ്ദേഹം പ്രതികരിക്കുകയുണ്ടായി. ആഷ്ലി സെന്റ് ക്ലെയർ 2024 സെപ്റ്റംബറിലാണ് ഇലോൺ മസ്കിന്റെ മകനായ റോമുലസിന് ജന്മം നൽകിയത്.തുടർന്ന് 2025 ഫെബ്രുവരിയിലാണ് മസ്ക് ആണ് കുട്ടിയുടെ പിതാവ് എന്ന കാര്യം അവർ സോഷ്യൽ മീഡിയ പ്ലാറ്റ്ഫോമായ എക്സിലൂടെ പരസ്യമാക്കിയത്.
