ഓസ്ട്രിയൻ ആൽപ്സ് പർവതനിരകൾക്ക് മുകളിൽ നടന്ന ഒരു ഭയാനകമായ അപകടത്തിന്റെ വീഡിയോ സോഷ്യൽ മീഡിയയിൽ വൈറലാവുകയാണ്. ആകാശത്തിലൂടെ പറക്കുകയായിരുന്ന ഒരു വനിതാ പാരാഗ്ലൈഡർ പെട്ടെന്ന് ഒരു ചെറിയ വിമാനവുമായി കൂട്ടിയിടിക്കുകയായിരുന്നു. ഇടിയുടെ ആഘാതത്തിൽ വിമാനം പാരാഗ്ലൈഡറുടെ പാരച്യൂട്ട് കീറിമുറിക്കുകയും, നിയന്ത്രണം നഷ്ടപ്പെട്ട യുവതി ആകാശത്ത് നിന്ന് താഴേക്ക് പതിക്കുകയുമായിരുന്നു. ആ സംഭവങ്ങളുടെ ദൃശ്യങ്ങളെല്ലാം ക്യാമറയിൽ പതിഞ്ഞിട്ടുണ്ട്.
വടക്കൻ ഓസ്ട്രിയയിലെ ഷ്മിറ്റൻഹോഹെ പർവതനിരയ്ക്ക് സമീപമാണ് അപകടം നടന്നത്. മനോഹരമായ പർവതപ്രദേശത്തിന് മുകളിലൂടെ പറക്കുന്നതിനിടെയാണ് 44 കാരിയായ പാരാഗ്ലൈഡർ സബ്രീനയ്ക്ക് തൊട്ടുമുകളിലായി പെട്ടെന്ന് ഒരു ചെറിയ വിമാനം പ്രത്യക്ഷപ്പെട്ടത്. നിമിഷങ്ങൾക്കകം വിമാനം പാരാഗ്ലൈഡറുടെ പാരച്യൂട്ടിൽ ഇടിക്കുന്നത് യുവതിയുടെ ക്യാമറയിൽ പതിഞ്ഞ വീഡിയോയിൽ കാണാം.
കൂട്ടിയിടിച്ച ഉടൻ തന്നെ പാരച്യൂട്ടിന്റെ ചിറകുകൾ കീറിപ്പോവുകയും, സബ്രീന ആകാശത്ത് അതിവേഗത്തിൽ കറങ്ങി താഴേക്ക് പതിക്കാൻ തുടങ്ങുകയും ചെയ്തു. കീറിയ പാരച്യൂട്ട് തുണികൾ അവർക്ക് ചുറ്റും വരിഞ്ഞുമുറുകിയതോടെ കാര്യങ്ങൾ പൂർണ്ണമായും നിയന്ത്രണാതീതമായി. അവർ വളരെ വേഗത്തിൽ താഴേക്ക് പതിക്കുന്നതാണ് വീഡിയോയിലുള്ളത്. പരിഭ്രാന്തിക്കും അനിശ്ചിതത്വത്തിനുമിടയിലും സബ്രീന പാരാഗ്ലൈഡർ നിയന്ത്രിക്കാൻ പരമാവധി ശ്രമിക്കുന്നുണ്ട്. ഒടുവിൽ അവസാന നിമിഷത്തിൽ അവർ തങ്ങളുടെ എമർജൻസി പാരച്യൂട്ട് തുറന്നതാണ് ജീവൻ രക്ഷിക്കാൻ സഹായിച്ചത്.. പിന്നീട് പോലീസ് ഹെലികോപ്റ്റർ എത്തി ഇവരെ രക്ഷപ്പെടുത്തുകയും ചികിത്സയ്ക്കായി ആശുപത്രിയിലേക്ക് കൊണ്ടുപോവുകയും ചെയ്തു.
. “ഞാൻ ഇവിടെ ഇരിക്കുകയാണെന്ന് എനിക്ക് ഇപ്പോഴും വിശ്വസിക്കാൻ കഴിയുന്നില്ല,” എന്ന് അപകടത്തിന് ശേഷം, അവർ ഇൻസ്റ്റാഗ്രാമിൽ കുറിച്ചു. അപകടത്തിൽപ്പെട്ട വിമാനം സുരക്ഷിതമായി സെൽ ആം സീ എയർപോർട്ടിൽ ഇറക്കാൻ 28കാരനായ പൈലറ്റിനും സാധിച്ചു. സമൂഹ മാധ്യമങ്ങളിൽ പ്രചരിച്ച ഈ വീഡിയോ കണ്ട് പലരും അമ്പരന്നിരിക്കുകയാണ്. ഇതൊരു അത്ഭുതമല്ലാതെ മറ്റൊന്നുമല്ലെന്നാണ് വീഡിയോ കണ്ട നടുക്കം വിട്ടുമാറാത്ത പലരും പറയുന്നത്. ശരിയായ സമയത്ത് എമർജൻസി പാരച്യൂട്ട് തുറക്കാനുള്ള സബ്രീനയുടെ മനോധൈര്യത്തെയും സമയോചിതമായ ഇടപെടലിനെയും എല്ലാവരും പ്രശംസിച്ചു.
