യാത്രകളിൽ ഏറ്റവും സുരക്ഷിതമെന്ന് കരുതപ്പെടുന്ന വിമാനയാത്ര പോലും ഇപ്പോൾ സുരക്ഷാ ആശങ്കകളിലേക്ക് വഴിമാറുകയാണ്. വിമാനത്തിനുള്ളിൽ ഉറങ്ങിക്കിടക്കുന്ന സഹയാത്രികരുടെ ബാഗുകളിൽ നിന്ന് പണം തട്ടിയെടുക്കുന്ന ഞെട്ടിക്കുന്ന സംഭവത്തിന്‍റെ ദൃശ്യങ്ങളാണ് ഇപ്പോൾ സമൂഹമാധ്യമങ്ങളിൽ വൈറലാകുന്നത്.
വിമാനത്തിലെ ഓവർഹെഡ് ലഗേജ് കമ്പാർട്ട്മെന്‍റുകൾ തുറന്ന്, ഉറങ്ങിക്കിടക്കുന്ന യാത്രക്കാരുടെ സാധനങ്ങൾ പരതുന്ന ഒരു യാത്രക്കാരന്‍റെ ദൃശ്യങ്ങളാണ് വീഡിയോയിലുള്ളത്. യാത്രക്കാർ ആരും തന്നെ തങ്ങളുടെ സാധനങ്ങൾ പരിശോധിക്കപ്പെടുന്നുണ്ടെന്ന് അറിയാതെ ഉറങ്ങുമ്പോഴാണ് ഈ കവർച്ച നടന്നത്.
യാത്രാവേളകളിൽ സ്വന്തം വിലപിടിപ്പുള്ള വസ്തുക്കളുടെ സുരക്ഷ ഉറപ്പാക്കേണ്ടതിന്‍റെ പ്രാധാന്യത്തെക്കുറിച്ചാണ് സോഷ്യൽ മീഡിയ ഉപയോക്താക്കൾ ഇപ്പോൾ സംസാരിക്കുന്നത്. റിപ്പോർട്ടുകൾ പ്രകാരം, സംഭവവുമായി ബന്ധപ്പെട്ട് 51 കാരനായ ഒരു ചൈനീസ് വിനോദസഞ്ചാരിയെ ബാങ്കോക്കിലെ ഡോൺ മുയെംഗ് വിമാനത്താവളത്തിൽ വെച്ച് ഒക്ടോബർ 12-ന് അറസ്റ്റ് ചെയ്തു.
യാത്രാക്കാരുടെ ബാങ്ക് കാർഡുകൾ മോഷ്ടിച്ചുവെന്നാണ് ഇയാൾക്കെതിരെയുള്ള ആരോപണം. വിമാനം ലാൻഡ് ചെയ്തതിന് തൊട്ടുപിന്നാലെ, പോർട്ടബിൾ കാർഡ് റീഡർ ഉപയോഗിച്ച് ഇയാൾ അനധികൃത ഇടപാടുകൾ നടത്തിയതായി പോലിസ് സംശയിക്കുന്നു.
കൂടാതെ, ഇതൊരു വലിയ ക്രിമിനൽ ശൃംഖലയുടെ ഭാഗമാണോ എന്നും അന്വേഷണ ഉദ്യോഗസ്ഥർ പരിശോധിക്കുന്നുണ്ട്. പ്രതിയെ കസ്റ്റഡിയിലെടുത്തതിന് ശേഷമാണ് നഷ്ടപ്പെട്ട സാധനങ്ങൾ തിരിച്ചറിഞ്ഞത്. യാത്രക്കാർ ഉറങ്ങുമ്പോഴോ ശ്രദ്ധ തിരിക്കുമ്പോഴോ അവരുടെ ലഗേജുകൾ എത്രയെളുപ്പത്തിൽ കവർച്ച ചെയ്യപ്പെടാം എന്നതിന്‍റെ ഉദാഹരണമാണ് ഈ സംഭവം.
സൗകര്യത്തിന് വേണ്ടി യാത്രക്കാർ തങ്ങളുടെ ബാഗുകൾ പലപ്പോഴും സീറ്റിന് മുകളിലുള്ള കമ്പാർട്ട്മെന്‍റുകളിൽ വയ്ക്കാറുണ്ടെങ്കിലും വാലറ്റുകൾ, ബാങ്ക് കാർഡുകൾ, ഇലക്ട്രോണിക് ഉപകരണങ്ങൾ തുടങ്ങിയ വിലപിടിപ്പുള്ള സാധനങ്ങൾ സൂക്ഷിക്കുമ്പോൾ ഇനി മുതൽ കൂടുതൽ ജാഗ്രത പാലിക്കേണ്ടതുണ്ടെന്ന് ഈ സംഭവം ഓർമിപ്പിക്കുന്നു.
