വന്യജീവിയെ പീഡിപ്പിക്കുന്ന രീതിയിൽ ജീവനുള്ള മലമ്പാമ്പിനെ കയറാക്കി ഉപയോഗിച്ച് ചാടകളി നടത്തിയ യുവാക്കളുടെ ദൃശ്യങ്ങൾ സമൂഹമാധ്യമങ്ങളിൽ വലിയ തോതിലുള്ള പ്രതിഷേധത്തിന് ഇടയാക്കുന്നു. എറണാകുളത്തു നിന്നുള്ളതാണെന്ന് കരുതപ്പെടുന്ന ഈ നടുക്കുന്ന വീഡിയോ ‘സ്ട്രീറ്റ് ഡോഗ് ഓഫ് ബോംബെ’ എന്ന ഇൻസ്റ്റാഗ്രാം പേജാണ് പുറത്തുവിട്ടത്.
വീഡിയോയിൽ നാല് യുവാക്കൾ ചേർന്ന് ഒരു ജീവനുള്ള മലമ്പാമ്പിനെ കൈകാര്യം ചെയ്യുന്നത് വ്യക്തമാണ്. ഇതിൽ രണ്ടുപേർ പാമ്പിനെ ഇരുവശത്തുമായി പിടിച്ച് ചരട് പോലെ വീശുമ്പോൾ, മൂന്നാമതൊരാൾ കയർ ചാടുന്നത് പോലെ പാമ്പിനെ മറികടന്ന് ചാടുകയാണ്. വിനോദത്തിനായി വന്യമൃഗങ്ങളെ ക്രൂരമായി ഉപയോഗിക്കുന്ന ഈ ദൃശ്യങ്ങൾ മൃഗസ്നേഹികൾക്കിടയിലും പൊതുജനങ്ങൾക്കിടയിലും കടുത്ത ആശങ്കയാണ് ഉണ്ടാക്കിയിരിക്കുന്നത്.
വന്യമൃഗങ്ങളെ കളിപ്പാട്ടങ്ങളോ വിനോദോപാധികളോ ആയി കാണരുതെന്നും അവയുടെ സ്വാഭാവിക ആവാസവ്യവസ്ഥയിലും സുരക്ഷിതത്വത്തിലും ജീവിക്കാൻ അവയ്ക്ക് അവകാശമുണ്ടെന്നും ചൂണ്ടിക്കാണിച്ചാണ് ഈ ദൃശ്യങ്ങൾ സമൂഹമാധ്യമങ്ങളിൽ പങ്കുവെച്ചത്. സംഭവത്തിൽ കേരള വനം വകുപ്പ് അടിയന്തരമായി ഇടപെട്ട് അന്വേഷണം നടത്തണമെന്നും, നിയമപ്രകാരം കുറ്റക്കാർക്കെതിരെ ശക്തമായ നടപടി സ്വീകരിക്കണമെന്നും പ്രസ്തുത ഇൻസ്റ്റാഗ്രാം പേജ് ആവശ്യപ്പെട്ടു.
വന്യജീവി സംരക്ഷണ നിയമങ്ങളുടെ ലംഘനമായ ഇത്തരം പ്രവൃത്തികൾക്കെതിരെ കർശന നടപടിയെടുക്കണമെന്നും, വന്യജീവികളോട് ആദരവോടെ പെരുമാറുന്നതിനെക്കുറിച്ച് യുവതലമുറയിൽ ബോധവൽക്കരണം നൽകേണ്ടതിന്‍റെ ആവശ്യകതയാണ് ഈ സംഭവം വീണ്ടും ഓർമിപ്പിക്കുന്നത്.
