കടൽത്തീരത്ത് സോഷ്യൽ മീഡിയയ്ക്കായി റീൽസ് ചിത്രീകരിക്കുന്നതിൽ മുഴുകിയ മാതാപിതാക്കൾ സ്വന്തം കുട്ടി തിരമാലകളിൽപെട്ട് അപകടത്തിലായത് അറിഞ്ഞില്ല. ഒടുവിൽ ഒരു അപരിചിതൻ എത്തിയാണ് കുട്ടിയെ രക്ഷിച്ചത്. സമൂഹമാധ്യമങ്ങളിൽ വൈറലായ ഈ വീഡിയോ കുട്ടികളുടെ സുരക്ഷയെക്കുറിച്ചും സോഷ്യൽ മീഡിയ ഭ്രാന്തിനെക്കുറിച്ചും വലിയ ചർച്ചകൾക്കാണ് വഴിവെച്ചിരിക്കുന്നത്.
എക്സ് അടക്കമുള്ള സമൂഹമാധ്യമങ്ങളിൽ പ്രചരിക്കുന്ന വീഡിയോയിൽ, കടൽത്തീരത്ത് തിരമാലകൾ അടിക്കുന്ന ഭാഗത്ത് മാതാപിതാക്കൾ റീൽസ് ഷൂട്ട് ചെയ്യുന്നത് കാണാം. അമ്മയുടെ കയ്യിൽനിന്ന് പിടിവിട്ട് താഴെ വീണ കൊച്ചുകുട്ടിയെ തിരമാലകൾ തള്ളിക്കൊണ്ടുപോകുന്നതും, ഇതുകണ്ടെങ്കിലും മാതാപിതാക്കൾ റീൽസ് ഷൂട്ടിംഗിൽ തന്നെ ശ്രദ്ധ കേന്ദ്രീകരിക്കുന്നതും വീഡിയോയിലുണ്ട്.
പെൺകുട്ടി വെള്ളത്തിൽ വീണ് ബുദ്ധിമുട്ടുന്നത് കണ്ട് ഉടൻതന്നെ ഒരു വഴിയാത്രക്കാരൻ ഓടിയെത്തി കുട്ടിയുടെ കൈപിടിച്ച് സുരക്ഷിതമായി മാതാപിതാക്കളുടെ അരികിലേക്ക് എത്തിക്കുകയായിരുന്നു. ഈ സമയം സെൽഫി സ്റ്റിക്കിൽ വീഡിയോ പകർത്തുന്ന തിരക്കിലായിരുന്നു പിതാവ്.
മറിയം എന്ന എക്സ് ഉപയോക്താവാണ് ഈ ദൃശ്യങ്ങൾ സമൂഹമാധ്യമങ്ങളിൽ പങ്കുവെച്ചത്. കടൽത്തീരത്ത് ഭർത്താവിനൊപ്പം എത്തിയപ്പോഴാണ് താൻ ഈ സംഭവം കണ്ടതെന്ന് അവർ പറഞ്ഞു. റീൽസുകൾ നിർമിക്കുന്നതിനുള്ള ഭ്രാന്ത് സ്വന്തം കുഞ്ഞുങ്ങളെപ്പോലും അവഗണിക്കുന്ന അവസ്ഥയിലേക്ക് എത്തിയിരിക്കുകയാണോ എന്ന് അവർ ചോദിച്ചു.
വീഡിയോ വൈറലായതോടെ മാതാപിതാക്കൾക്കെതിരെ രൂക്ഷമായ വിമർശനമാണ് ഉയരുന്നത്. റീൽസിന് ലഭിക്കുന്ന ലൈക്കുകൾക്കുവേണ്ടി സ്വന്തം കുട്ടിയുടെ ജീവൻ പോലും പണയം വെക്കുന്ന മാതാപിതാക്കളുടെ മനോഭാവത്തെ പലരും ചോദ്യം ചെയ്തു. റീൽസ് ഏതാനും മിനിറ്റുകൾ മാത്രമാണെന്നും എന്നാൽ മനുഷ്യജീവിതത്തിന് രണ്ടാം അവസരമില്ലെന്നും ഉപയോക്താക്കൾ ഓർമ്മിപ്പിച്ചു. അപരിചിതന്‍റെ സമയോചിതമായ ഇടപെടൽ കൊണ്ടാണ് വൻ ദുരന്തം ഒഴിവായത്.
