മക്കളെ അവസാനമായി ഒരുനോക്ക് കാണാൻ പോലുമാകാതെ മരണത്തിന് കീഴടങ്ങിയ അമ്മയുടെ മക്കളെ കണ്ടെത്താൻ സമൂഹമാധ്യമങ്ങളിലൂടെ ഹൃദയസ്പർശിയായ അഭ്യർഥന.നാല് പതിറ്റാണ്ടോളം ഒറ്റയ്ക്ക് ജീവിച്ചതിന് ശേഷം മക്കളെ കാണാനാവാതെയാണ് അമ്മയുടെ വിയോഗം. ചെന്നൈ സ്വദേശിനിയായ ലളിത കൃഷ്ണമൂർത്തിയാണ് മുംബൈയിൽ വെച്ച് അന്തരിച്ചത്. മരണശേഷവും ഇവരുടെ രണ്ട് പെൺമക്കളെയും കണ്ടെത്താനായി ബന്ധുക്കളും അയൽക്കാരും ചേർന്ന് പത്രങ്ങളിൽ പരസ്യം നൽകിയിരിക്കുകയാണ്.
സാമ്പത്തിക വിദഗ്ധനായ കിഷോർ സുബ്രഹ്മണ്യൻ എക്സിൽ പങ്കുവെച്ച കുറിപ്പിലൂടെയാണ് ഈ നൊമ്പരപ്പെടുത്തുന്ന വാർത്ത പുറംലോകം അറിഞ്ഞത്. ലളിത കൃഷ്ണമൂർത്തിയുടെ ബന്ധുക്കളെ തേടിക്കൊണ്ടുള്ള പത്രപരസ്യത്തിന്റെ ചിത്രവും അദ്ദേഹം പങ്കുവെച്ചിട്ടുണ്ട്. പരസ്യത്തിൽ നൽകിയിരുന്ന ഫോൺ നമ്പറിൽ വിളിച്ചപ്പോൾ പവൻ ഷെട്ടി എന്നയാളാണ് ലളിതയുടെ അവസാന നാളുകളെക്കുറിച്ച് വിശദീകരിച്ചതെന്ന് കിഷോർ പറയുന്നു.
ഏകദേശം 40 വർഷത്തോളമായി ഒറ്റയ്ക്കാണ് ഈ അമ്മ താമസിച്ചിരുന്നത്. 2026 നവംബർ 13ന് മുംബൈയിലായിരുന്നു അന്ത്യം. ഇവർക്ക് രണ്ട് പെൺമക്കളുണ്ടെങ്കിലും അവർ ഇപ്പോൾ എവിടെയാണെന്നോ, എന്തുകൊണ്ടാണ് അമ്മയുമായി അകന്നു കഴിഞ്ഞതെന്നോ ആർക്കും അറിയില്ല. ആ മൗനം ഉള്ളിലൊതുക്കിയാണ് ലളിത വിടവാങ്ങിയത്.
ബന്ധുക്കളായ ഒരു ദമ്പതികളും ഫ്ലാറ്റിലെ അയൽക്കാരുമായിരുന്നു ലളിതയ്ക്ക് ആകെയുണ്ടായിരുന്ന ആശ്രയം. മരണശേഷം അടുത്ത ബന്ധുക്കൾ ആരുമില്ലാതിരുന്നതിനാൽ പവൻ ഷെട്ടി ഉൾപ്പെടെയുള്ള അയൽക്കാരും ബന്ധുക്കളുമാണ് നിയമനടപടികൾ പൂർത്തിയാക്കിയതും സംസ്കാര ചടങ്ങുകൾക്ക് നേതൃത്വം നൽകിയതും.
ലളിതയുടെ ചിത്രം സഹിതം നൽകിയ പത്രപരസ്യത്തിൽ, മരണവിവരം അറിയിക്കുന്നതിനൊപ്പം മക്കളോടോ ബന്ധുക്കളോടോ അവരെക്കുറിച്ച് വിവരമുള്ളവരോടോ ബന്ധപ്പെടാൻ അഭ്യർഥിക്കുന്നുണ്ട്. ജീവിച്ചിരുന്നപ്പോൾ കണ്ടെത്താൻ കഴിയാതിരുന്ന മക്കൾക്കായി മരണശേഷവും ആ അമ്മയുടെ പേരിൽ തെരച്ചിൽ തുടരുകയാണ്.
സംഭവം പങ്കുവെച്ചുകൊണ്ട് കിഷോർ സുബ്രഹ്മണ്യൻ എഴുതിയ കുറിപ്പ് ആരുടെയും കണ്ണ് നനയിക്കുന്നതാണ്. വിദേശത്തും മറ്റു നഗരങ്ങളിലുമായി കഴിയുന്ന മക്കൾ അയക്കുന്ന പണത്തിന് ഒരിക്കലും അവരുടെ സാന്നിധ്യത്തിന് പകരമാകാൻ കഴിയില്ലെന്ന് അദ്ദേഹം ഓർമിപ്പിക്കുന്നു.
“ജനിക്കുമ്പോൾ ഏതൊരു കുഞ്ഞിനും കൂട്ടിനായി ആദ്യമുണ്ടാവുക അമ്മയാണ്. എന്നാൽ അവസാന നിമിഷം ‘അമ്മേ’ എന്ന് വിളിച്ച് യാത്രയാക്കാൻ പോലും ആരുമില്ലാതെ ഒറ്റയ്ക്ക് മരിക്കേണ്ടി വരുന്ന അമ്മമാരുണ്ട്. മക്കൾ എന്നത് വെറുമൊരു എടിഎം അല്ല. പണം അയച്ചു നൽകാൻ സാധിക്കും, പക്ഷേ രാത്രികൾക്ക് നീളം കൂടുമ്പോൾ അരികിലിരിക്കാനോ, ഭയം പിടികൂടുമ്പോൾ കൈപിടിക്കാനോ ആ പണത്തിന് കഴിയില്ല,” അദ്ദേഹം കുറിച്ചു.
ജോലി സംബന്ധമായി പല നഗരങ്ങളിലായി കഴിഞ്ഞിരുന്ന താനും കുടുംബവും, പ്രായമായ മാതാപിതാക്കൾക്കൊപ്പം കഴിയാനായി വീണ്ടും ഒരു കൂട്ടുകുടുംബത്തിലേക്ക് മടങ്ങുകയാണെന്നും 51-കാരനായ കിഷോർ വ്യക്തമാക്കി. നഗരങ്ങളിലെ ഫ്ലാറ്റുകളിൽ ടെലിവിഷൻ മാത്രം കൂട്ടായി ഒറ്റപ്പെട്ടുപോകുന്ന വൃദ്ധരായ മാതാപിതാക്കളുടെ അവസ്ഥയിലേക്കാണ് അദ്ദേഹം വിരൽചൂണ്ടുന്നത്.
കുറിപ്പ് വൈറലായതോടെ നിരവധി പേരാണ് വികാരനിർഭരമായ പ്രതികരണങ്ങളുമായി എത്തിയത്. ലളിതയുടെ അവസാന യാത്രയിൽ കൂടെ നിന്ന മുംബൈയിലെ അയൽക്കാരാണ് അവരുടെ ‘യഥാർഥ ബന്ധുക്കൾ’ എന്ന് ഒരാൾ കുറിച്ചു.
അതേസമയം, മക്കൾ അകന്നുനിൽക്കാനുള്ള യഥാർത്ഥ കാരണം അറിയാതെ അവരെ മാത്രം കുറ്റപ്പെടുത്തരുതെന്ന് മറ്റൊരാൾ അഭിപ്രായപ്പെട്ടു. വിദേശത്ത് മക്കൾക്കുള്ള നേട്ടങ്ങളിൽ ഒരുകാലത്ത് അഭിമാനിച്ചിരുന്ന പല മാതാപിതാക്കളും ഇന്ന് വാർധക്യത്തിൽ കടുത്ത ഏകാന്തത അനുഭവിക്കുകയാണെന്ന് മറ്റൊരു ഉപയോക്താവ് പങ്കുവെച്ചു. അമ്മയുടെ വിയോഗവാർത്തയെങ്കിലും മക്കളെ അറിയിക്കാനാകുമെന്ന പ്രതീക്ഷയിലാണ് ബന്ധുക്കളും അയൽക്കാരും ഇപ്പോഴും തെരച്ചിൽ തുടരുന്നത്.
