കൊച്ചി: പ്രധാനമന്ത്രി നരേന്ദ്രമോദിയുടെ പ്രസംഗം പാവങ്ങൾക്കൊപ്പവും പ്രവൃത്തി ശതകോടീശ്വരന്മാർക്കു വേണ്ടിയുമാണെന്നു സിഐടിയു സംസ്ഥാന പ്രസിഡന്‍റ് ആനത്തലവട്ടം ആനന്ദൻ. എറണാകുളം ടൗണ്‍ ഹാളിൽ കേരള സ്റ്റേറ്റ് കണ്‍സ്ട്രക്ഷൻ വർക്കേഴ്സ് ഫെഡറേഷൻ (സിഐടിയു) സംസ്ഥാന സമ്മേളനം ഉദ്ഘാടനംചെയ്തു പ്രസംഗിക്കുകയായിരുന്നു അദ്ദേഹം.
ബിജെപി ചെയ്യുന്നതു പോലെ പൊതുമേഖലാ സ്ഥാപനങ്ങൾ വിൽക്കുകയല്ല വേണ്ടത്. മതേതര നിലപാടു പുലർത്തുന്ന കേരളത്തിൽ ക്രൈസ്തവ, മുസ്‌ലിം സമുദായ അംഗങ്ങളെ ഒഴിവാക്കി ബിജെപിക്കു നിലനില്ക്കാനാകില്ലെന്നും ആനത്തലവട്ടം ആനന്ദൻ പറഞ്ഞു. കഴിഞ്ഞ എൽഡിഎഫ് ഭരണകാലത്തു ലാഭത്തിലായിരുന്ന വ്യവസായങ്ങളെല്ലാം യുഡിഎഫ് സർക്കാർ നഷ്ടത്തിലാക്കിയാണ് ഇറങ്ങിയത്.
കൈത്തറി- ഖാദി മേഖലയിലെ പ്രശ്നങ്ങളെ പഠിച്ചു പരിഹരിക്കുകയാണ് ഇപ്പോഴത്തെ സർക്കാർ ചെയ്തതെന്ന് അദ്ദേഹം പറഞ്ഞു. സർക്കാരിന്‍റെ ഇത്രയും കാലത്തെ ഭരണം സമസ്ത മേഖലയ്ക്കും ഉണർവേകിയിട്ടുണ്ട്.
കെഎസ്ആർടിസി പോലുള്ള പൊതുമേഖലാ സ്ഥാപനങ്ങളെ സർക്കാർ സംരക്ഷിക്കുമെന്ന് അദ്ദേഹം പറഞ്ഞു. സമ്മേളനത്തിൽ സംസ്ഥാന പ്രസിഡന്‍റ് കെ.പി. സഹദേവൻ, കെ.ചന്ദ്രൻപിള്ള, അഖിലേന്ത്യാ ഫെഡറേഷൻ ജനറൽ സെക്രട്ടറി ദിപഞ്ചൻ ചക്രവർത്തി, സിപിഎം ജില്ലാ സെക്രട്ടറി പി. രാജീവ്, തുടങ്ങിയവർ പ്രസംഗിച്ചു.
