മമ്മൂട്ടി നായകനാകുന്ന മധുരരാജയിലെ തന്റെ കഥാപാത്രത്തിന്റെ പേരുമായി ബന്ധപ്പെട്ട തർക്കങ്ങൾക്ക് മറുപടിയുമായി നടൻ അജു വർഗീസ്. ചിത്രത്തിൽ അജു വർഗീസ് അവതരിപ്പിക്കുന്ന കഥാപാത്രത്തിന്റെ പേര് സുരു എന്നാണ്. ഇത് തമിഴ് സൂപ്പർസ്റ്റാർ സൂര്യയെ അധിക്ഷേപിക്കുന്നതാണെന്നായിരുന്നു സൂര്യ ആരാധകരുടെ വിമർശനം.
അജു വർഗീസിന് പിന്തുണയുമായി വിജയ് ആരാധകർ കൂടി രംഗത്തെത്തിയതോടെ തർക്കം രൂക്ഷമായി. ഈ സാഹചര്യത്തിലാണ് വിശദീകരണവുമായി അജു വർഗീസ് നേരിട്ടെത്തിയത്.
“പ്രിയപ്പെട്ട സൂര്യ സർ ഫാൻസ് അറിയുവാൻ, മധുരരാജാ എന്ന സിനിമയിലെ എന്റെ പേര് ഞാൻ അല്ല ഇട്ടത്. മാത്രമല്ല അതും നിങ്ങൾ കരുതുന്ന പോലെ ആ വലിയ മനുഷ്യനെ കളിയാക്കാൻ വേണ്ടിയും അല്ല. അദ്ദേഹത്തിനെ ആരാധിക്കുന്ന ഫോക്കസ് ഒൗട്ടിൽ നിൽക്കുന്ന ഒരുവൻ’. സൂര്യക്കൊപ്പം നിൽക്കുന്ന ചിത്രം പങ്കുവച്ച് അജു വർഗീസ് കുറിച്ചു.