ഏറെനാളായി കോടന്പക്കത്ത് പാറിപ്പറന്ന് നടക്കുകയായിരുന്ന ഒരു പ്രണയകഥയുടെ കാര്യത്തിൽ തീരുമാനമായി. എങ്കേയും എപ്പോതും എന്ന ചിത്രത്തിൽ ഒന്നിച്ച് അഭിനയിച്ച കാലത്താണ് ഇരുവരും പ്രണയത്തിലായത്. ജയ്യും അഞ്ജലിയും പ്രണയത്തിലാണെന്ന വാർത്ത ഏറെ നാളായി സോഷ്യൽ മീഡിയയിലൂടെയും അല്ലാതെയും പ്രചരിക്കുന്നുണ്ടായിരുന്നു.
ജ്യോതികയുടെ “ദോശചാലഞ്ചിലൂടെ’യാണ് അക്കാര്യത്തിൽ തീരുമാനമായത്. തങ്ങളുടെ പ്രിയപ്പെട്ടവൾക്ക് എത്രപുരുഷന്മാർ ദോശ ഉണ്ടാക്കി കൊടുത്തു എന്നതയിരുന്നു ജ്യോതികയുടെ വെല്ലുവിളി. വെല്ലുവിളി സ്വീകരിച്ച നടൻ സൂര്യ ഉൾപ്പടെയുള്ളവർ തങ്ങളുടെ പ്രിയതമയ്ക്ക് ദോശ ഉണ്ടാക്കിക്കൊടുത്തു. ആ വെല്ലുവിളി ജയ്യും സ്വീകരിച്ചു. തന്‍റെ പ്രിയപ്പെട്ടവളായ അഞ്ജലിക്ക് ദോശ ചുട്ടു കൊടുക്കുന്ന ഫോട്ടോ ജയ് ട്വിറ്ററിൽ ഇട്ടു.
ഏറ്റവും പ്രിയപ്പെട്ടയാൾ നമുക്ക് വേണ്ടി പാകം ചെയ്യുന്നത് മധുരമായ കാഴ്ചയാണെന്ന് പോസ്റ്റ് ഷെയർ ചെയ്തുകൊണ്ട് അഞ്ജലിയും പറഞ്ഞു. ഈ ചിത്രങ്ങൾ പുറത്ത് വന്നതോടെയാണ് അഞ്ജലിയും ജയ്യും പ്രണയത്തിലാണെന്ന വാർത്ത ആരാധകർ സ്ഥിരീകരിച്ചത്. ഏറെ നാളായി ഈ പ്രണയ വാർത്ത ട്വിറ്ററിലൂടെ പരക്കുന്നുണ്ടായിരുന്നു. അഞ്ജലിയുടെ പിറന്നാളിന് ജയ് ആശംസ അറിയിച്ചപ്പോൾ, എപ്പോഴും നീ എനിക്കൊപ്പം വേണം എന്നായിരുന്നു നടിയുടെ കമന്‍റ്. എങ്കേയും എപ്പോതും എന്ന ചിത്രത്തിന് ശേഷമാണ് ഇവരുടെ പ്രണയ കഥ പ്രചരിക്കാൻ തുടങ്ങിയത്. തുടക്കത്തിലൊക്കെ ഇരുവരും വാർത്ത നിഷേധിച്ചിരുന്നു. ഇനി ജയ്ക്കൊപ്പം അഭിനയിക്കില്ല എന്ന് വരെ അഞ്ജലി പറഞ്ഞിരുന്നു.
