അഞ്ചല്‍ : അഞ്ചലില്‍ ബന്ധുവായ പെണ്‍കുട്ടിയെ വര്‍ഷങ്ങളായി പീഡിപ്പിച്ചുവന്ന 60 കാരന്‍ അറസ്റ്റിൽ. ഇയാള്‍ പെണ്‍കുട്ടിയുടെ പതിനൊന്നാം വയസ് മുതല്‍ പീഡിപ്പിച്ചുവരികയായിരുന്നുവെന്ന് അഞ്ചല്‍ പോലീസ് പറഞ്ഞു.
അടുത്തിടെയായി പെണ്‍കുട്ടി ശാരീരിക അസ്വസ്ഥതകള്‍ പ്രകടിപ്പിക്കുകയും മാനസിക പ്രശ്നങ്ങള്‍ കാട്ടുകയും ചെയ്തതോടെ വിവിധ ആശുപത്രികളില്‍ പ്രവേശിപ്പിച്ചിരുന്നു.
ഇവിടെ നിന്ന് മെഡിക്കല്‍കോളേജ് ആശുപത്രിയില്‍ എത്തിച്ച പെണ്‍കുട്ടിയെ മാനസികാരോഗ്യ വിദഗ്ധരുടെ സഹായത്തോടെ നടത്തിയ കൗണ്‍സിലിംഗിലാണ് ഞെട്ടിപ്പിക്കുന്ന പീഡന വിവരം പുറത്തറിയുന്നത്.
ആശുപത്രി അധികൃതരുടെ നിര്‍ദേശപ്രകാരം ബന്ധുക്കള്‍ അഞ്ചല്‍ പോലീസില്‍ പരാതി നല്‍കുകയായിരുന്നു. പെണ്‍കുട്ടിയുടെ രഹസ്യ മൊഴിയടക്കം രേഖപ്പെടുത്തിയ പോലീസ് കഴിഞ്ഞ ദിവസം പ്രതിയെ അറസ്റ്റ് ചെയ്തു.
അഞ്ചല്‍ സര്‍ക്കിള്‍ ഇന്‍സ്പെക്ടര്‍ സിഎല്‍ സുധീറിന്‍റെ നേതൃത്വത്തിലുള്ള പോലീസ് സംഘമാണ് പ്രതിയെ അറസ്റ്റ് ചെയ്തത്. അറസ്റ്റ് രേഖപ്പെടുത്തിയ പ്രതിയെ പുനലൂര്‍ ഒന്നാം ക്ലാസ് മജിസ്ട്രേറ്റ് കോടതിയില്‍ ഹാജരാക്കി റിമാന്‍റ് ചെയ്തു.
