കാണാതെ പഠിച്ച് ഡയലോഗ് പറയുന്നത് എനിക്ക് ഭയങ്കര പാടാണ്. ബാക്ക്ഗ്രൗണ്ടിൽനിന്ന് ആരെങ്കിലും പറഞ്ഞ് തരുന്നതു പറയും. സേതുരാമയ്യർ സിബിഐയിൽ ഒരു വലിയ സീൻ ഉണ്ടായിരുന്നു. അന്ന് മമ്മൂക്കയ്ക്ക് ആ സീൻ എടുത്തിട്ട് വേണം ഒരു ഫംഗ്ഷന് പോകാൻ. അദ്ദേഹം മുകേഷിനോട് പറഞ്ഞു, അവനോട് മര്യാദയ്ക്ക് ഡയലോഗ് പഠിക്കാൻ പറയണം , എനിക്ക് പോകണമെന്ന്.
ഞാൻ എന്തായാലും അങ്ങ് പോകും എന്നൊക്കെ പറയുണ്ട്. എന്തോ ഫസ്റ്റ് ടേക്കിൽ എല്ലാം ഓക്കെ ആയി. മമ്മൂക്കയുടെ കൂടെ അഭിനയിക്കുമ്പോൾ അങ്ങനെ ഡയലോഗ് പ്രശ്നം വരാറില്ല. പക്ഷേ, മോഹൻലാലിന്റെ കൂടെ അഭിനയിക്കുമ്പോൾ വരാറുണ്ട്. പുള്ളിയുടെ ആക്റ്റിങ് ഡിഫറന്റ് അല്ലേ. പുള്ളി ബിഹേവ് ചെയ്യണതല്ലേ. ഞാൻ പെട്ടെന്നു വിചാരിക്കും എന്റെ അടുത്ത് എന്തോ കാര്യമായിട്ട് പറയുകയാണെന്ന്.
പുള്ളി ഡയലോഗ് പറയുമ്പോൾ നമ്മുടെ ഡയലോഗ് മറന്നിട്ട് പുള്ളി എന്താ പറയുന്നത് എന്ന് നമ്മൾ ശ്രദ്ധിച്ചു പോകും. അങ്ങനെ എനിക്ക് ഒരു പ്രാവശ്യം പറ്റിയിട്ടുണ്ട്. അതുകൊണ്ടു പറഞ്ഞതാണ്. -അപ്പ ഹാജ
