ഗാന്ധിനഗർ: ഭീം ആർമി സംസ്ഥാന ചെയർമാനെ ഇടുക്കി അടിമാലി പോലീസ് കോട്ടയത്തു നിന്നും അറസ്റ്റ് ചെയ്തതിനു കാരണമായ പീഡന സംഭവം നടന്നത് 2019-ൽ.ആലപ്പുഴ മിത്രക്കരി പുതുക്കരി തറയിൽ റോബിനെ(30)യാണ് ഇന്നലെ അറസ്റ്റ് ചെയ്തത്.
ഇന്നലെ രാത്രി ഏഴിന് എംജി സർവകലാശാലയുടെ മുന്പിലെ സമരപന്തലിന് സമീപത്തുനിന്നാണ് ഇയാളെ അറസ്റ്റ് ചെയ്തത്.ആലപ്പുഴ രാമങ്കരി സ്റ്റേഷൻ അതിർത്തിയിൽപ്പെട്ട 29 കാരിയായ യുവതിയെ 2019-ൽ അടിമാലിയിലുള്ള ലോഡ്ജിലെത്തിച്ച് പീഡിപ്പിച്ചുവെന്ന കേസിലാണ് അറസ്റ്റ് ചെയ്തതെന്ന് അടിമാലി എസ്എച്ച്ഒ കെ. സുധീർ പറഞ്ഞു.
കഴിഞ്ഞ മാസമാണ് രാമങ്കരി എസ്എച്ച്ഒ രവി സന്തോഷിനു യുവതി പരാതി നൽകിയതെന്നും സംഭവം നടന്നത് അടിമാലിയിൽ ആയതിനാൽ കേസിന്‍റെ അന്വേഷണം അവിടെ പുരോഗമിക്കുകയാണെന്നും എസ്എച്ച്ഒ പറഞ്ഞു.
എംജി യൂണിവേഴ്സിറ്റിയിലെ ഗവേഷണ വിദ്യാർഥി ദീപാ മോഹനനോടുള്ള ജാതി വിവേചനത്തിനെതിരേ ഭീം ആർമിയുടെ നേതൃത്വത്തിൽ നടന്ന നിരാഹാര സമരത്തിന്‍റെ പത്രത്തിൽ വന്ന ഫോട്ടോയിലൂടെയാണ് റോബിനെക്കുറിച്ച് അടിമാലി പോലീസിനു വിവരം ലഭിച്ചത്.
തുടർന്നായിരുന്നു ഗാന്ധിനഗർ പോലീസിന്റെ സഹായത്തോടെ അടിമാലി എസ്എച്ച്ഒ കെ. സുധീറിന്‍റെ നേതൃത്വത്തിലുള്ള പോലീസ് അറസ്റ്റ് ചെയ്തത്.
