അര്‍ദ്ധരാത്രി തന്റെ സോഷ്യല്‍മീഡിയ അക്കൗണ്ടില്‍ അശ്ലീല സന്ദേശം അയച്ച യുവാവിന് കുറിക്കുകൊള്ളുന്ന മറുപടിയുമായി നടി അര്‍ഥന ബിനു. നടിയുടെ ഇന്‍സ്റ്റഗ്രാം അക്കൗണ്ടിലാണ് യുവാവ് അശ്ലീല സന്ദേശം അയച്ചത്. യുവാവിന്റെ പേരുവിവരങ്ങള്‍ അടക്കം അടങ്ങിയ സന്ദേശത്തിന്റെ സ്‌ക്രീന്‍ഷോട്ട് തന്റെ ഇന്‍സ്റ്റഗ്രാം അക്കൗണ്ടില്‍ പങ്കുവച്ചാണ് നടി മറുപടി പറഞ്ഞിരിക്കുന്നത്.
‘ഞാന്‍ പോകണോ വേണ്ടയോ എന്നൊക്കെ സ്വയം തീരുമാനിക്കും. പിന്നെ ഞാന്‍ എന്താണെന്നും എനിക്ക് അറിയാം. ആരുടെയേലും ശ്രദ്ധപിടിച്ചുപറ്റുകയാണ് ആവശ്യമെങ്കില്‍ ഇതാ സ്റ്റോറി ഇട്ടിട്ടുണ്ട്.’-അര്‍ഥന യദുകൃഷ്ണന്‍ എന്നയാളുടെ അശ്ലീല സന്ദേശത്തിന് മറുപടിയായി കുറിച്ചിരിക്കുന്നതിങ്ങനെയാണ്.
ഗോകുല്‍ സുരേഷ് നായകനായെത്തിയ ”മുദ്ദുഗൗ” എന്ന ചിത്രത്തിലൂടെ സിനിമയിലെത്തിയ നടിയാണ് നടന്‍ വിജയകുമാറിന്റെ മകളായ അര്‍ഥന ബിനു. മലയാളത്തില്‍ നിന്ന് തമിഴിലേക്കും പിന്നീട് തെലുങ്കിലും എത്തിയ അര്‍ഥന സോഷ്യല്‍മീഡിയയിലും സജീവമായി ഇടപെടാറുള്ളയാളാണ്.
