ഓർമകളുടെ വേലിയേറ്റങ്ങൾ അലയടിക്കുന്ന ബേക്കലിൽ വീണ്ടും അവരെത്തി. കേരളാ ടൂറിസത്തിന്റെ സിനിമാ ടൂറിസം പദ്ധതിയുടെ ഭാഗമായി സംവിധായകൻ മണിരത്നം, നടി മനീഷാ കൊയ് രാള, ഛായാഗ്രാഹകൻ രാജീവ് മേനോൻ എന്നിവർ ബേക്കലിലെത്തി.
ബോംബെ സിനിമയുടെ മുപ്പതാം വാർഷികത്തോടനുബന്ധിച്ചാണ് സന്ദർശനം. ചടങ്ങിൽ ടൂറിസം മന്ത്രി പി. എ മുഹമ്മദ് റിയാസും പങ്കെടുത്തു. ബോംബെ സിനിമയില് എ.ആര്. റഹ്മാന്റെ സംഗീത സംവിധാനത്തില് പിറന്ന സൂപ്പർഹിറ്റ് ഗാനമായ ‘ഉയിരേ’ ചിത്രീകരിച്ചത് ബേക്കൽ കോട്ടയിലും പരിസരത്തുമാണ്. താരങ്ങൾ എത്തിയ വാർത്ത മന്ത്രി ഫേസ്ബുക്കിൽ കുറിച്ചു.
ഫേസ്ബുക്ക് കുറിപ്പിന്റെ പൂർണ രൂപം…
മണിരത്നം, മനീഷാ കൊയ് രാള, രാജീവ് മേനോൻ
@ ബേക്കൽ..
30 years of BOMBAY movie
Cinema Tourism @ Kerala
സിനിമാ ടൂറിസം പദ്ധതി പ്രഖ്യാപിച്ചപ്പോൾ തന്നെ ബോംബ സിനിമയുടെ പ്രധാന ലൊക്കേഷൻ ആയിരുന്ന കാസർഗോഡ് ജില്ലയിലെ ബേക്കലിലേക്ക് സിനിമയുടെ അണിയറ പ്രവർത്തകരെ കൊണ്ടുവരാൻ ശ്രമിക്കും എന്ന് സൂചിപ്പിച്ചിരുന്നു.
ബോംബെ സിനിമയുടെ മുപ്പതാം വാർഷികത്തിൽ കേരളാ ടൂറിസത്തിന്റെ സിനിമാ ടൂറിസം പദ്ധതിയുടെ ഭാഗമായി സംവിധായകൻ മണിരത്നം, നടി മനീഷാ കൊയ് രാള, ഛായാഗ്രാഹകൻ രാജീവ് മേനോൻ തുടങ്ങിയവർ ബേക്കലിൽ. കേരള ടൂറിസത്തിന്റെ വളർച്ചക്ക് സഹകരിക്കാൻ തയാറാണെന്ന് അവർ അറിയിച്ചു.
