കൊച്ചി: നഗരത്തില് 21കിലോ കഞ്ചാവ് ശേഖരം കണ്ടെത്തിയ കേസില് എക്സൈസ് അന്വേഷണം ആരംഭിച്ചു. കേസുമായി ബന്ധപ്പെട്ട് എറണാകുളം പൊന്നുരുന്നി കൊല്ലത്ത് പറമ്പില് വീട്ടില് വാടകയ്ക്ക് താമസിക്കുന്ന മധുര സ്വദേശി സെല്വകുമാറിനെയാണ്(35)എക്സൈസ് സംഘം അറസ്റ്റ് ചെയ്തത്.
വൈറ്റില പൊന്നുരുന്നി ഭാഗത്ത് എക്സൈസ് എന്ഫോഴ്സ്മെന്റ് ആന്ഡ് ആന്റി നര്ക്കോട്ടിക് ഇന്സ്പെക്ടര് ഡി.എസ്.അരുണിന്റെ നേതൃത്വത്തില് നടത്തിയ പരിശോധനയില് സെല്വകുമാറില് നിന്ന് വില്പനയ്ക്കെത്തിച്ച രണ്ടുകിലോ കഞ്ചാവ് പിടിച്ചെടുത്തു.
തുടര്ന്നുള്ള അന്വേഷണത്തില് പ്രതിയുടെ വീട്ടില്നിന്ന് 19കിലോ കഞ്ചാവ് കണ്ടെത്തി. ആകെ 21കിലോ കഞ്ചാവ് കണ്ടെടുക്കുകയായിരുന്നു.
ജില്ലയുടെ വിവിധ ഭാഗങ്ങളില് കഞ്ചാവ് വില്പന നടത്തുന്നത് ഇയാളാണെന്ന വിവരത്തിന്റെ അടിസ്ഥാനത്തില് ആഴ്ചകളായി നടത്തിയ നിരീക്ഷണത്തിലാണ് പ്രതി പിടിയിലായത്. കഞ്ചാവിന്റെ ഉറവിടം കണ്ടെത്തുന്നതിനുള്ള അന്വേഷണമാണ് പുരോഗമിക്കുന്നത്.
