സ്വത്തുതര്‍ക്കത്തിന്റെ പേരില്‍ വൃദ്ധനായ ഭര്‍ത്തൃപിതാവിനെ പാടത്തിനു നടുവിലൂടെ വലിച്ചിഴച്ചു കൊണ്ടു പോകുന്ന സ്ത്രീയും മക്കളുമാണ് സോഷ്യല്‍ മീഡിയയില്‍ ചര്‍ച്ചാവിഷയം. രാജസ്ഥാനിലാണ് മനുഷ്യത്വരഹിതമായ സംഭവം നടന്നത്. വിയറാം എന്ന വൃദ്ധനാണ് ഈ ദുരനുഭവം നേരിടേണ്ടി വന്നത്. വിയറാമും സഹോദരന്‍ ഹേമരാജും ചേര്‍ന്ന് വാങ്ങിയ സ്ഥലത്തെ സംബന്ധിച്ച തര്‍ക്കമാണ് വഴക്കില്‍ കലാശിച്ചത്. ഹേമരാജിന്റെ മരണത്തെത്തുടര്‍ന്ന് ഈ സ്ഥലം അദ്ദേഹത്തിന്റെ മക്കളായ ഭഗവാന്‍ റാമും ബാബുലാലും ചേര്‍ന്ന് കൈവശപ്പെടുത്തുകയായിരുന്നു. വിയറാം സ്ഥലത്തിന്റെ പകുതി ആവശ്യപ്പെട്ടെങ്കിലും സഹോദരപുത്രന്മാര്‍ അത് നല്‍കാന്‍ കൂട്ടാക്കിയില്ല.
തനിക്കവകാശപ്പെട്ട സ്ഥലത്ത് ട്രാക്റ്റര്‍ ഉപയോഗിച്ച് പണി നടത്തുകയായിരുന്നത് തടയാന്‍ ശ്രമിക്കുന്നതിനിടെയാണ് വിയറാമിന് കൊച്ചുമക്കളില്‍ നിന്ന് ദുരനുഭവം നേരിട്ടത്. ഭഗവാന്‍ റാമിന്റെ ഭാര്യ മോഹിനിയും അവരുടെ പെണ്മക്കളായ രാജേശ്വരി, കവിത തുടങ്ങിയവരും മകന്‍ അശോകും ചേര്‍ന്നാണ് വിയറാമിനെ വലിച്ചിഴച്ച് പുറത്തേക്കിട്ടത്. വൃദ്ധനെ ആക്രമിക്കുന്നതിന്റെ വിഡിയോ സോഷ്യല്‍ മീഡിയയില്‍ ചര്‍ച്ചയായതോടെ പ്രശ്‌നത്തില്‍ ഇടപെട്ട പോലീസ് ബാബുലാലിനെ അറസ്റ്റു ചെയ്യുകയും ചെയ്തു.
