ജൻമദിനം ആഘോഷിക്കുന്നവരും ആഘോഷിക്കാത്തവരും നമ്മുടെ കൂട്ടത്തിലുണ്ടാകും. ഓരോ വർഷവും വയസ് കൂടുന്നതോർത്ത് ടെൻഷൻ അടിക്കുന്ന ആളുകൾ ഇതൊന്നും അത്ര കാര്യമായി എടുക്കാറില്ലെങ്കിലും ചിലവാക്കാൻ പണം ഇല്ലാത്തതിന്റെ പേരിൽ നാളിതുവരെ ആയി ഒരു ജൻമദിനം പോലും ആഘോഷിക്കാത്ത മനുഷ്യരും നമുക്കിടയിലുണ്ട്.
അപ്രതീക്ഷിതമായി ഭക്ഷണം ഡെലിവറി ചെയ്യാനെത്തിയ ഏജന്റിന്റെ ജൻമദിനം ആഘോഷിച്ച വീഡിയോ ആണ് ഇപ്പോൾ സോഷ്യൽ മീഡിയയിൽ വൈറലാകുന്നത്. വീഡിനുള്ളിൽ ഒരു കസേരയിൽ ഇരിക്കുന്ന സൊമാറ്റോ ഡെലിവറി ഏജന്റായ യുവാവിൽ നിന്നാണ് വീഡിയോ തുടങ്ങുന്നത്.
ഒരു ഉപഭോക്താവിന്റെ വീട്ടിൽ കേക്ക് എത്തിക്കാൻ എത്തിയതായിരുന്നു അവൻ. വീടിനുള്ളിലേക്ക് അവനെ വീട്ടുകാർ ക്ഷണിക്കുകയും അവനോട് ഒന്ന് റിലാക്സ് ആകാൻ പറയുകയും ചെയ്തു. തനിക്ക് മുന്നിൽ എന്താണ് നടക്കുന്നതെന്ന് അവന് വ്യക്തമായിരുന്നില്ല.
ഓർഡർ കൊടുക്കാൻ കൊണ്ട് വന്ന ആ കേക്ക് മുറിക്കാൻ വീട്ടുകാർ അവനോട് ആവശ്യപ്പെട്ടു. ആദ്യം ഒന്നു ഷോക്ക് ആയെങ്കിലും തന്റെ ജന്മദിനം ആഘോഷിക്കുന്നതിനാണ് വീട്ടുകാർ കേക്ക് മുറിക്കാൻ ആവശ്യപ്പെട്ടതെന്ന് അവന് മനസിലായി.
എന്ത് പറയണമെന്ന് അറിയാതെ അവന്റെ വാക്കുകൾ പുറത്ത് വന്നില്ല. കണ്ണുകൾ നിറഞ്ഞു. ജീവിതത്തിന്റെ കഷ്ടപ്പാടുകൾക്കിടയിൽ, ഒരിക്കലും തീരാത്ത ഓട്ടത്തിനിടെയിൽ ഉള്ളുനിറച്ചൊരു അനുഭവം ഒരുപക്ഷേ, ആ ഡെലിവറി ഏജന്റിന്റെ ജീവിതത്തിൽ ആദ്യത്തെതാകും.
വീഡിയോ വൈറലായതോടെ നിരവധി ആളുകളാണ് കമന്റുമായി എത്തിയത്. ഒരിക്കലും അവന്റെ ജീവിത്തതിൽ ഇത്തരമൊരും സർപ്രൈസ് പ്രതീക്ഷിച്ചിട്ടുണ്ടാവില്ലന്ന് മിക്കവരും പറഞ്ഞു.
