കണ്ണൂർ: കണ്ണൂരിൽ ആദ്യമായി അരങ്ങേറിയ ഡ്രോൺ മെഗാ ഷോ കാണാൻ ഒഴുകിയെത്തിയത് ലക്ഷങ്ങൾ. കണ്ണടച്ച് തുറക്കുംപോലെ ആകാശ ദൃശ്യവിസ്മയം തീർന്നുപോയ നിരാശയിലാണ് അവരെല്ലാം മടങ്ങിയത്. ചിലർ അപ്പോൾതന്നെ കോർപറേഷൻ അധികൃതരോട് നിരാശയും ദേഷ്യവുമെല്ലാം കൊട്ടിതീർത്തു. ബാക്കിയുള്ളവർ സമൂഹമാധ്യമങ്ങളിൽ പൊങ്കാലയിട്ട് സങ്കടം പെയ്ത് തീർക്കുകയാണ്.
10 നാൾ നൃത്തസംഗീത വിസ്മയങ്ങളും വൈദ്യുത ദീപാലങ്കാരങ്ങളും പ്രമുഖരുടെ സാന്നിധ്യവുമായി നാടിന്‍റെ ഹൃദയം കീഴടക്കിയ കണ്ണൂർ ദസറയ്ക്ക് സമാപനം കുറിച്ചാണ് മെഗാ ഡ്രോൺ ഷോ അരങ്ങേറിയത്. ഇപ്രാവശ്യത്തെ കണ്ണൂർ ദസറയ്ക്ക് ഒരു സസ്പെൻസുണ്ടാകുമെന്ന് നേരത്തെ പറഞ്ഞുവച്ചിരുന്നു. പ്രോഗ്രാം റിലീസിംഗിനാണ് അത് മെഗാ ഡ്രോ ഷോ ആണെന്ന് വെളിപ്പെട്ടത്.
അപ്പോൾ മുതൽ ആളുകൾ “സേവ് ദ ഡേറ്റു’മായി കാത്തിരിക്കുകയായിരുന്നു. സമീപ ജില്ലകളിൽ നിന്ന് ഉൾപ്പെടെ ആളുകൾ ഇന്നലെ വൈകുന്നേരത്തോടെ കണ്ണൂർ ജവഹർ സ്റ്റേഡിയത്തിലേക്ക് ഒഴുകാൻ തുടങ്ങി. റോഡുകളെല്ലാം വാഹനങ്ങൾ നിറഞ്ഞു. പലരും വാഹനങ്ങൾ ഒതുക്കി കിലോമീറ്ററുകൾ നടന്ന് സ്റ്റേഡിയത്തിൽ എത്തി.
രാത്രി പതിനൊന്നേ കാലോടെയാണ് മെഗാ ഡ്രോൺ ഷോ തുടങ്ങിയത്. “നമസ്കാരം കണ്ണൂർ’ എന്ന് വാനിൽ തെളിഞ്ഞു. തിങ്ങിനിറഞ്ഞ ആൾക്കൂട്ടം ആർപ്പുവിളികളോടെ വരവേറ്റു. പിന്നെയെല്ലാം വളരെ പെട്ടെന്നായിരുന്നു. ആനകൾ, കണ്ണൂർ കോട്ട, തെയ്യം….താങ്ക്‌യു…ശൂ..!!!
പത്തു മിനുട്ടിനുവേണ്ടി 10 മണിക്കൂർ റോഡുകൾ ബ്ലോക്കാക്കിയെന്ന് ഒരു ട്രോളിന് കാളപെറ്റെന്ന് കേട്ടപ്പോഴെ ക‍യറെടുത്തെന്ന നിരാശയാണ് മറ്റൊരാളുടെ മറുപടി. പിന്നെയുള്ളതിലേറെയും എഴുതാനും പറയാനും കൊള്ളാത്ത ട്രോളുകളാണെന്ന് പറഞ്ഞാൽ മതിയല്ലോ! ഏതായാലും ഇതുപോലൊരു ഗതികേട് കോർപറേഷൻ സാരഥികൾ ഒട്ടും നിനച്ചില്ലാത്രെ. പൊങ്കാല നിറഞ്ഞ് ഫേസ്ബുക്കും ഇൻസ്റ്റയൊന്നും തുറക്കാൻ കഴിയുന്നില്ല. വെളുക്കാൻ തേച്ചത് പാണ്ടായോ ആവോ…!
