കൊച്ചി: ഇലന്തൂര് ഇരട്ട നരബലിക്കേസില് വിസ്താരം ഇന്നും തുടരും. രണ്ടാം സാക്ഷി സെല്വരാജിന്റെ വിസ്താരമാണ് ഇന്നും തുടരുന്നത്. കൊല്ലപ്പെട്ട പത്മയുടെ മകനാണ് സെല്വരാജ്. ഇന്നലെ രണ്ടാം ദിവസത്തെ സാക്ഷി വിസ്താരത്തില് മരണപ്പെട്ട പത്മയുടെ സഹോദരി പഴനിയമ്മയുടെ പ്രതിഭാഗം വിസ്താരം പൂര്ത്തിയായി. കേസിലെ ഒന്നാം സാക്ഷിയാണിവര്.
വിചാരണ നേരിടുന്ന ഒന്നാം പ്രതി പെരുമ്പാവൂര് സ്വദേശി മുഹമ്മദ് ഷാഫി, ഇലന്തൂര് സ്വദേശികളായ രണ്ടാം പ്രതി ഭഗവല്സിങ്, മൂന്നാം പ്രതി ഭാര്യ ലൈല എന്നിവര് ഇന്നലെ കോടതിയില് നേരിട്ടു ഹാജരായി.
കേസിലെ മുഖ്യസാക്ഷികളില് രണ്ടു പേരായ ലോട്ടറി വില്പ്പനക്കാരിയുടെയും കൊല്ലപ്പെട്ട പത്മ വാടകയ്ക്കു താമസിച്ചിരുന്നു വീടിന്റെ ഉടമയുടെയും വിസ്താരം ഇന്നാരംഭിക്കും. ജഡ്ജി ടി. മധുസൂദനനാണു കേസ് പരിഗണിക്കുന്നത്. പ്രോസിക്യൂഷനു വേണ്ടി സ്പെഷല് പബ്ലിക് പ്രോസിക്യൂട്ടര് വി.അജകുമാര് ഹാജരായി.
