ന്യൂഡൽഹി: ഡൽഹി തണുത്തുവിറയ്ക്കുന്നു. 119 വർഷത്തിനിടയിലെ ഏറ്റവും തണുപ്പേറിയ ഡിസംബർ മാസം എന്ന നിലയിലേക്ക് ഈ വർഷം മാറുകയാണെന്ന് കാലാവസ്ഥ വകുപ്പ് അറിയിച്ചു. 19.85 ഡിഗ്രി സെൽഷ്യസാണ് ഡൽഹിയിലെ ഈ മാസത്തെ ശരാശരി ഉയർന്ന താപനില. ഈ മാസം അവസാനത്തോടെ ഈ ശരാശരി 19.15 ഡിഗ്രി സെൽഷ്യസിലേക്ക് എത്തുമെന്നാണു മീറ്ററോളജിക്കൽ ഡിപ്പാർട്ട്മെന്‍റ് പ്രതീക്ഷിക്കുന്നത്.
1919, 1929, 1961, 1997 വർഷങ്ങളിലാണ് ഇതിനു മുന്പ് ശരാശരി താപനില 20 ഡിഗ്രി സെൽഷ്യസിനു താഴെയായത്. കണക്കുകൂട്ടുന്ന തരത്തിൽ ഈ മാസം മുപ്പത്തൊന്നോടെ 19.15 ഡിഗ്രി സെൽഷ്യസിലേക്ക് താപനില താഴ്ന്നുകഴിഞ്ഞാൽ 1901-നുശേഷമുള്ള ഏറ്റവും തണുപ്പേറിയ ഡിസംബറാകും അത്.
1997 ഡിസംബറിലാണ് ഇതിനുമുന്പ് ഏറ്റവും തണുപ്പ് രേഖപ്പെടുത്തിയത്. 17.3 ഡിഗ്രി സെൽഷ്യസായിരുന്നു ഇതിനു മുന്പുള്ള കുറഞ്ഞ താപനില. 1919, 1929 വർഷങ്ങളിൽ 19.8 ഡിഗ്രി സെൽഷ്യസിലേക്കും 1962-ൽ 20 ഡിഗ്രി സെൽഷ്യസിലേക്കും ശരാശരി താപനിലയെത്തി.
ഡിസംബർ പതിനെട്ടിന് 12.2 ഡിഗ്രി സെൽഷ്യസാണ് ഡൽഹിയിലെ താപനിലയെന്ന് സഫ്ദർജംഗ് ഒബ്സർവേറ്ററി പറയുന്നു. എന്നാൽ 25-ന് പാലത്തെ കാലാവസ്ഥ കേന്ദ്രത്തിൽ 11.4 ഡിഗ്രി സെൽഷ്യസ് താപനില രേഖപ്പെടുത്തി. ഡിസംബർ 13-നുശേഷം ഡൽഹിയിൽ മരംകോച്ചുന്ന തണുപ്പാണ് അനുഭവപ്പെടുന്നത്. 1997-നുശേഷം ഇത് ആദ്യമാണെന്നും അധികൃതർ പറയുന്നു.
