ആഗ്രഹങ്ങൾക്ക് പ്രായമില്ലെന്നാണല്ലോ പൊതുവെ പറയുന്നത്. നമ്മൾ കുഞ്ഞുങ്ങൾ ആയിരിക്കുന്പോൾ മാതാപിതാക്കളോടും മുത്തശ്ശിമാരോടും മുത്തശ്ചനോടുമൊക്കെ നമ്മുടെ കുഞ്ഞു കുഞ്ഞ് ആഗ്രഹങ്ങൾ പങ്കുവയ്ക്കാറില്ലേ. അവരെക്കൊണ്ട് കഴിയുന്ന രീതിയിൽ അതെല്ലാം സാധിച്ചുകൊടുക്കാൻ അന്നൊക്കെ അവർ ശ്രമിക്കുകയും ചെയ്യുമായിരുന്നു. വലുതായ ശേഷം എന്നെങ്കിലും അവരുടെ ആഗ്രഹങ്ങൾ എന്താണെന്ന് എപ്പോഴെങ്കിലും നിങ്ങൾ തിരിച്ച് ചോദിച്ചിട്ടുണ്ടോ? എന്നാൽ ചോദിക്കണം.
നമ്മളെ വളർത്തുന്ന തിരക്കിൽ അവരൊക്കെ അവരുടെ ഇഷ്ടങ്ങളും ആഗ്രഹങ്ങളുമൊക്കെ ചിലപ്പോൾ മറന്ന് പോയിട്ടുണ്ടാകും. പറ്റുന്ന പോലെ അവയിൽ ചിലതൊക്കെ സാധിച്ചു കൊടുക്കാൻ ശ്രമിക്കണമെന്ന് തെളിയിക്കുന്നൊരു വീഡിയോ ആണിപ്പോൾ സോഷ്യൽ മീഡിയയിൽ വൈറലാകുന്നത്.
രവിരാജ് രാജ് പുരോഹിത് എന്ന യുവാവാണ് ഇതിന്റെ വീഡിയോ സോഷ്യൽ മീഡിയയിൽ പങ്കുവച്ചത്. രവിരാജിനോട് തന്റെ മുത്തശ്ശി രാവിലെ ഒരു ചോദ്യം ചോദിച്ചു. അതവനെ വല്ലാതെ മനസിൽ അലച്ചിൽ ഉണ്ടാക്കി. ഉച്ച ആയപ്പോൾ അതാ മുത്തശ്ശി ചോദിച്ച കാര്യം സഫലീകരിച്ചിരിക്കുന്നു രവി.
ഇനി ചോദ്യം എന്താണെന്ന് നോക്കാം, രാിലെ വീടിനു പുറത്തേക്ക് നോക്കി നിന്ന മുത്തശ്ശി ആകാശത്തിലൂടെ ഒരു വിമാനം പറക്കുന്നത് ശ്രദ്ധയിൽപ്പെട്ടു. ഇതെങ്ങനെയാണ് പറക്കുന്നതെന്ന് രവിരാജിനോട് മുത്തശ്ശി വളരെ ജിജ്ഞാസയോടെ തിരക്കി. അത് കേട്ടതും അവൻ ഫ്ലൈറ്റ് ടിക്കറ്റ് ബുക്ക്ചെയ്തു.
അൽപസമയത്തിനു ശേഷം മുത്തശ്ശിയേയുംകൊണ്ട് എയർപോർട്ടിലേക്ക് പുറപ്പെട്ടു. അവിടെ ചെന്നപ്പോഴാണ് മുത്തശ്ശി ശരിക്കും ഞെട്ടിപ്പോയത്. വിമാനത്തിൽ കയറാൻ വേണ്ടിയാണ് തന്നെ കൊച്ചുമകൻ കൂട്ടിക്കൊണ്ട് വന്നതെന്ന് മനസിലായത്. വളരെ സന്തോഷത്തോടെ അവർ വിമാനനത്തിൽ കയറുന്നതും അവിടെ ഇരുന്നുള്ള കാഴ്ചകൾ വീക്ഷിക്കുന്നതുമെല്ലാം രവിരാജ് വീഡിയോ ആയി പകർത്തി. എന്തായാലും വീഡിയോ ഇപ്പോൾ വൈറലാണ്.
നിരവധി ആളുകളാണ് വീഡിയോയ്ക്ക് കമന്റുമായി എത്തിയത്. എല്ലാ മനുഷ്യരും കണ്ടു പഠിക്കേണ്ട് വ്യക്തിത്വമാണ് രവിരാജിന്റെ എന്ന് പലരും കമന്റ് ചെയ്തു.
