കൊച്ചി: രണ്ട് വൃക്കകളും തകരാറിലായ ഞാറക്കൽ സ്വദേശി കെ.എസ്. വിനീതിന്‍റെ (28 ) ചികിത്സാ ചെലവിനായി പൊന്നൂസ് ചാരിറ്റബിൾ ട്രസ്റ്റും യൂത്ത് കോണ്ഗ്രസ് കൂട്ടായ്മയും ചേർന്ന് കാരുണ്യ യാത്ര നടത്തി.
വൃക്കമാറ്റിവയ്ക്കൽ ശസ്ത്രക്രിയക്ക് ആവ ശ്യമായ15 ലക്ഷം രൂപ കണ്ടെത്തുന്നതിനായാണ് യൂത്ത് കോണ്ഗ്രസ് പ്രവർത്തകരുടെ നേതൃത്വത്തിൽ കാരുണ്യ യാത്ര നടത്തിയതെന്ന് കോഓർഡിനേറ്റർമാരായ ടിറ്റോ ആന്‍റണി, സേതുരാജ് എന്നിവർ പറഞ്ഞു.
നടി ഹണി റോസ്, പി.ടി. തോമസ് എംഎൽഎ, “ചങ്ക്സ്’ സിനിമയുടെ സംവിധായകൻ ഒമർ ലുലു എന്നിവർ ആദ്യ ടിക്കറ്റ് എടുത്ത് ഹൈക്കോടതി മുതൽ വല്ലാർപാടം വരെ യാത്ര ചെയ്തു.ടിറ്റോ ആന്‍റണി, കെ. സേതുരാജ്, ജോസ്റ്റൻ ജേക്കബ്, കെ.യു. അനൂപ്, നീൽ ഹർഷൽ, ആകാശ് അനന്ത്, നിവിൻ കുഞ്ഞയ്പ്പ് എന്നിവർ നേതൃത്വം നൽകി.
ഭാര്യയും ഒന്നര വയസുള്ള മകളും അടങ്ങുന്ന നിർധന കുടുംബത്തിന്‍റെ ഏക ആശ്രയമാണ് വിനീത്. രണ്ടു വൃക്കകളും തകരാറിലായ വിനീതിന് അമ്മയാണ് വൃക്ക ദാനം ചെയ്യുന്നത്. ഇതേ കൂട്ടായ്മ കഴിഞ്ഞ വർഷം നടത്തിയ കാരുണ്യ യാത്രയിലൂടെ സുഖം പ്രാപിച്ച ഉണ്ണി ജോർജും കുടുംബസമ്മേതം ആദ്യ യാത്രയിൽ പങ്കെടുത്തു.
