വിമാന റദ്ദാക്കലുകളെത്തുടർന്ന് ഇൻഡിഗോ വിമാനക്കമ്പനിക്കെതിരായ വിമർശനങ്ങളും ചർച്ചകളും ഇപ്പോഴും തുടരുകയാണ്. കഴിഞ്ഞ ദിവസങ്ങളിൽ ഇൻഡിഗോ വിമാനങ്ങൾ കൂട്ടത്തോടെ റദ്ദാക്കിയതുമൂലമുണ്ടായ വലിയ പ്രതിസന്ധിക്ക് പിന്നാലെ, വിമാനക്കമ്പനിയുടെ പ്രവർത്തനങ്ങൾ 10 ശതമാനം കുറയ്ക്കാൻ സർക്കാർ ഉത്തരവിട്ടിരുന്നു.
വിമാനക്കമ്പനിയുടെ സർവീസുകൾ സുസ്ഥിരമാക്കുന്നതിനും റദ്ദാക്കലുകൾ നിയന്ത്രിക്കുന്നതിനും വേണ്ടിയാണ് റൂട്ടുകൾ വെട്ടിച്ചുരുക്കാൻ സർക്കാർ നിർദേശം നൽകിയത്. ഈ വിവാദങ്ങൾക്കിടയിൽ, വിമാനക്കമ്പനിയുടെ നിറങ്ങളോട് സാമ്യമുള്ള പെയിന്റ് അടിച്ച ഒരു “ഇൻഡിഗോ’ ഓട്ടോറിക്ഷയുടെ വീഡിയോ സമൂഹ മാധ്യമങ്ങളിൽ ശ്രദ്ധ നേടുകയാണ്.
കണ്ടന്റ് ക്രിയേറ്ററായ ഷൈലേന്ദ്ര സിംഗ് തന്റെ ഇൻസ്റ്റാഗ്രാം അക്കൗണ്ടിലാണ് ഈ ക്ലിപ്പ് പങ്കുവെച്ചത്. അദ്ദേഹം ഇൻഡിഗോ വിമാനങ്ങൾക്ക് സമാനമായ നിറങ്ങളിലുള്ള ഓട്ടോറിക്ഷ ഓടിക്കുന്നതാണ് വീഡിയോയിൽ കാണുന്നത്.
ഇത് മാത്രമല്ല, ആർട്ടിഫിഷ്യൽ ഇന്റലിജൻസ് (എഐ) സാങ്കേതികവിദ്യ ഉപയോഗിച്ച് നിർമ്മിച്ച ഈ വീഡിയോയിൽ വാഹനത്തിന് വിമാനത്തിന്റെ ചിറകുകളും റഡ്ഡറും നൽകിയിട്ടുണ്ട്. യാത്രക്കാരില്ലാതെ ഓട്ടോറിക്ഷ ഓടിക്കുന്ന ഷൈലേന്ദ്ര സിംഗ് ക്യാമറയ്ക്ക് നേരെ തംബ്സ്-അപ്പ് കാണിക്കുന്നുണ്ട്.
ഏതാനും നിമിഷങ്ങൾക്കകം വാഹനം ആകാശത്തിലൂടെ പറന്നുയരുന്ന ദൃശ്യങ്ങളാണ് പിന്നീട് കാണുന്നത്. ഇത് എഐ ഉപയോഗിച്ച് നിർമ്മിച്ച ദൃശ്യമാണ്. ഈ തമാശ വീഡിയോയ്ക്ക് സോഷ്യൽ മീഡിയയിൽ വലിയ പ്രതികരണമാണ് ലഭിച്ചത്.
“എഐയുടെ ശരിയായ ഉപയോഗമാണിത്’ എന്ന് ഒരാൾ അഭിപ്രായപ്പെട്ടപ്പോൾ, മറ്റൊരാൾ “ഡൽഹിയിൽ നിന്ന് ഭോപ്പാലിലേക്ക് കൊണ്ടുപോകാമോ’ എന്ന് തമാശയായി ചോദിച്ചു. “എയർലൈൻ കമ്പനികൾക്ക് ഹരിയാന റോഡ്വേസ് കടുത്ത മത്സരം നൽകുന്നു’ എന്നായിരുന്നു ഒരു വ്യക്തിയുടെ പരിഹാസം.
“ഇതങ്ങ് ചൊവ്വയിൽ പോകാതെ ശ്രദ്ധിക്കണം, സുരക്ഷിതമായി ഓടിക്കണം’ എന്നായിരുന്നു മറ്റൊരു കമന്റ്. ചിലർ ഇതിനെ “ഏറ്റവും മികച്ച വിമാനം’ എന്ന് വിശേഷിപ്പിക്കുകയും “ഇൻഡിഗോ വിമാനത്തേക്കാൾ കൂടുതൽ സൗകര്യങ്ങൾ ഇതിനുണ്ട്’ എന്ന് പരിഹസിക്കുകയും ചെയ്തു.
മൂന്ന് ദിവസത്തിനുള്ളിൽ 47,000-ത്തിലധികം ലൈക്കുകൾ ഈ വീഡിയോയ്ക്ക് ലഭിച്ചു. വീഡിയോയ്ക്ക് ലഭിച്ച പ്രതികരണങ്ങളാണ് തന്റെ ഇൻഡിഗോ ഓട്ടോറിക്ഷയെ “പറപ്പിച്ചത്’ എന്ന് സൂചിപ്പിച്ച് ഷൈലേന്ദ്ര സിംഗ് മറ്റൊരു വീഡിയോയും പിന്നീട് പങ്കുവെക്കുകയുണ്ടായി.
