ന്യൂഡൽഹി: കോൺഗ്രസ് വിട്ട കപിൽ സിബലിനെപ്പോലുള്ളവർ തിരികെ പാർട്ടിയിലേക്ക് വരുന്നത് അനുവദിക്കാമെങ്കിലും ജ്യോതിരാദിത്യ സിന്ധ്യയും ഹിമന്ത് ബിശ്വ ശർമയെപ്പോലുള്ളവരെ അനുവദിക്കാനാകില്ലെന്നു കോൺഗ്രസിന്‍റെ മാധ്യമവിഭാഗം മേധാവി ജയ്റാം രമേശ്.
സിന്ധ്യ “24 കാരറ്റ് വഞ്ചകൻ’ ആണെന്നും അദ്ദേഹം പറഞ്ഞു. കോൺഗ്രസ് വിട്ട ആരെങ്കിലും തിരിച്ചുവരാൻ സന്നദ്ധത കാണിച്ചാൽ അവരെ സ്വീകരിക്കുമോ എന്ന ചോദ്യത്തിന് മറുപടി നൽകുകയായിരുന്നു ജയ്റാം രമേശ്.
കപിൽ സിബലിനെപ്പോലുള്ളവർ പാർട്ടി വിട്ടശേഷം മാന്യമായ നിശബ്ദത പാലിച്ചിട്ടുണ്ട്. അവർ തിരികെ വരുന്നത് അനുവദിക്കാം. എന്നാൽ ജ്യോതിരാദിത്യ സിന്ധ്യയും ഹിമന്ത് ബിശ്വ ശർമയെപ്പോലുമുള്ളവരുടെ കാര്യം അങ്ങനെയല്ല.
സിബലിനെപ്പോലെയുള്ള നേതാക്കളെ സ്വാഗതം ചെയ്യാമെന്നാണ് ഞാൻ കരുതുന്നത്.എന്നാൽ പാർട്ടി വിടുകയും പാർട്ടിയെയും നേതൃത്വത്തെയും നശിപ്പിക്കാനായി ശ്രമിച്ചവരെയും തിരികെ സ്വാഗതം ചെയ്യേണ്ടതില്ല – ജയ്റാം രമേശ് പറഞ്ഞു.
