കണമല: ബ്രേക്ക്‌ തകരാറിൽ കണമല ഇറക്കത്തിൽ അപകടത്തിലായ ബസ് വേഗം വർധിക്കും മുമ്പ് മുന്നിലുള്ള കെഎസ്ആർടിസി ബസിൽ ഇടിച്ചുനിന്നതുമൂലം ഒഴിവായത് വൻഅപകടം. ഇന്നലെ രാവിലെയാണ് സംഭവം.
കെഎസ്ആർടിസി ബസ് നിർത്തിക്കൊടുത്ത് അപകടം ഒഴിവാക്കുകയായിരുന്നു. പിന്നിൽ നിയന്ത്രണം വിട്ട് ബസ് എത്തുന്നത് അറിഞ്ഞ കെഎസ്ആർടിസി ബസ് ഡ്രൈവർ ബസ് നിർത്തി.
ഇതോടെ പുറകിലുണ്ടായിരുന്ന നിയന്ത്രണം തെറ്റിയ ബസ് കെഎസ്ആർടിസി ബസിൽ ഇടിച്ചുനിന്നു. ഇങ്ങനെ സംഭവിച്ചില്ലായിരുന്നെങ്കിൽ കുത്തിറക്കത്തിലെ വളവിൽ ബസ് മറിഞ്ഞ് വൻ അപകടം സംഭവിക്കുമായിരുന്നെന്ന് പറയുന്നു.
വളവ് മറികടന്ന് എത്തിയാൽ കണമല ജംഗ്ഷനാണ്. ഇവിടെയും അപകടമുണ്ടാകും. ഇത് ഒഴിവാക്കാൻ കെഎസ്ആർടിസി ബസ് തടസമായി നിർത്തിയിട്ടത് മൂലം സാധ്യമായി.
രണ്ടും കൽപ്പിച്ച് കെഎസ്ആർടിസി ബസ് നിർത്തിയിടാൻ ഡ്രൈവർ കാട്ടിയ തന്‍റേടത്തെ പോലീസും നാട്ടുകാരും അഭിനന്ദിച്ചു. ഇടിച്ചുനിന്നതുമൂലം കെഎസ്ആർടിസി ബസിന് കേടുപാടുകളുണ്ടായി.
ഇടിയുടെ ആഘാതത്തിൽ കെഎസ്ആർടിസി ബസ് നിയന്ത്രണം തെറ്റി പോകാതിരിക്കാൻ ബ്രേക്കിട്ട് നിയന്ത്രിച്ചാണ് ബസ് നിർത്തിയിട്ടതെന്ന് ഡ്രൈവർ പറഞ്ഞു.
കേടുപാടുകൾ പരിഹരിക്കാനുള്ള തുക തീർഥാടക ബസ് അധികൃതർ നൽകി നഷ്ടം പരിഹരിച്ചു. അതീവ അപകടസാധ്യതയുള്ള അട്ടി വളവിന് മുമ്പ് പോലീസ് കൈ കാട്ടി വാഹനങ്ങൾ നിർത്തിച്ച് കോൺവെ ആയാണ് കടത്തിവിടുന്നത്.
എറണാകുളത്തുനിന്ന് എരുമേലി വഴി പമ്പയിലേക്ക് പോവുകയായിരുന്ന കെഎസ്ആർടിസി സ്‌പെഷൽ സർവീസ് ബസിലെ ജീവനക്കാരാണ് അപകടമൊഴിവാക്കാൻ ബസ് നിർത്തി സഹായിച്ചത്.
