നേമം : പ്രേമാഭ്യർഥന നിരസിച്ചതിനെ തുടർന്ന് പെണ്‍കുട്ടിയെ വീടുകയറി ആക്രമിച്ച കേസിലെ പ്രതികളെ നേമം പോലീസ് അറസ്റ്റുചെയ്തു.
തൂങ്ങാംപാറ കണ്ണംകോട് സതീഷ് ഭവനിൽ സതീഷ് (29) സുഹൃത്ത് പെരിങ്ങമ്മല പണ്ടാരവിളാകത്ത് വീട്ടിൽ ഷാജിമോൻ (28) എന്നിവരെയാണ് പോലീസ് അറസ്റ്റുചെയ്തത്. പെണ്‍കുട്ടിയെ ഇഷ്ടമാണെന്ന് പറഞ്ഞ് സതീഷ് നിരന്തരം ശല്യം ചെയ്തിരുന്നു.
ഇക്കാര്യം പെണ്‍കുട്ടി വീട്ടിൽ അറിയിച്ചതിനെ തുടർന്ന് പിതാവ് സതീഷിനെ താക്കീത് ചെയ്തിരുന്നു. ഈ വിരോധത്തിലാണ് പെണ്‍കുട്ടി ഒറ്റയ്ക്കുള്ള സമയത്ത് സുഹൃത്തിനെ കൂട്ടി സതീഷ് വീട്ടിലെത്തി അസഭ്യം പറയുകയും ഉപദ്രവിക്കുകയും ചെയ്തതെന്ന് പോലീസ് പറഞ്ഞു.
സംഭവത്തിനുശേഷം ഒളിവിൽ പോയ പ്രതികളെ ഫോർട്ട് എസി ജെ.കെ.ദിനിൽ, നേമം ഇൻസ്പെക്ടർ കെ.പ്രദീപ്, നേമം എസ്ഐമാരായ എസ്.എസ്. സജി, സഞ്ചു ജോസഫ്, എസ്എസ്ഐമാരായ പ്രദീപ്, അനിൽകുമാർ, സിസിപിഒ ഷിബു എന്നിവരടങ്ങിയ സംഘം പിടികൂടിയത്. നെയ്യാറ്റിൻകര കോടതിയിൽ ഹാജാരാക്കിയ പ്രതികളെ റിമാൻഡ് ചെയ്തു.
