ഒറ്റപ്പാലം: വരോട് കെപിഎസ് എംഎംവി എച്ച് എസ് ഇ വിഭാഗം നാഷണൽ സർവീസ് സ്കീം യൂണിറ്റിന്‍റെ സപ്തദിന ക്യാന്പിന്‍റെ ഭാഗമായി ലഹരിവിരുദ്ധ സന്ദേശം ഉയർത്തി ചുവർചിത്രം തയാറാക്കി. ജിജെബി സ്കൂളിന്‍റെ ചുവരിലാണ് ചിത്രം വരച്ചത്.
ക്യാന്പിലെ വിദ്യാർത്ഥികളോടൊപ്പം ശ്രീജ പള്ളമാണ് ചിത്രം തയാറാക്കിയത്. ചുവർചിത്ര നിർമാണത്തിൽ വിദ്യാർത്ഥികൾക്ക് പരിശീലനം നല്കുന്നതിന്‍റെ ഭാഗമായിട്ടാണ് ചുവരിൽ ചിത്രം വരച്ചത്. ലഹരി പദാർത്ഥങ്ങൾ വർജിക്കാനുള്ള സന്ദേശമാണ് ചിത്രത്തിലൂടെ നല്കിയത്.
ചുവർചിത്രങ്ങൾ നല്കുന്ന സന്ദേശങ്ങൾ, അതിന്‍റെ പ്രാധാന്യം എന്നിവയെക്കുറിച്ച് വിദ്യാർത്ഥികൾക്ക് ക്ലാസെടുത്തു.
ചിത്രകാരി ശ്രീജ പള്ളത്തിന്‍റെ ചിത്രരചനകൾ പരിചയപ്പെടുത്തിയുള്ള പരിശീലന ക്ലാസ് വിദ്യാർത്ഥികൾക്ക് പുതിയ അനുഭവമായി. പ്രിൻസിപ്പൽ സി.രാജേഷ് കുമാർ, പ്രോഗ്രാം ഓഫീസർ അരുണിമ പി.നായർ, ജിത പി.നായർ, പി.സ്മിത, എസ്.ഗീത എന്നിവർ പരിപാടിക്ക് നേതൃത്വം നല്കി.
