ഹൈദരാബാദ് നഗരത്തിന്റെ മനോഹാരിതയും സുരക്ഷിതത്വത്തെയും പുകഴ്ത്തികൊണ്ട് യുവതി സമൂഹ മാധ്യമങ്ങളിൽ പങ്കുവച്ച വീഡിയോ വൈറൽ. ഹൈദരാബാദ് നഗരത്തിലൂടെ രാത്രിയിൽ നടന്നു പോയ അനുഭവം സമൂഹ മാധ്യമങ്ങളിൽ പങ്കുവച്ചത് പുതിയ ചർച്ചകൾക്ക് വഴിവച്ചു.
ലീഷ എന്ന യുവതിയാണ് ഇൻസ്റ്റഗ്രാമിൽ ഹൈദരാബാദിന്റെ ഭംഗിയെക്കുറിച്ച് വർണിക്കുന്ന വീഡിയോ പോസ്റ്റ് ചെയ്തിരിക്കുന്നത്. ഹൈദരാബാദ് ഒരിക്കലെങ്കിലും വന്ന് കാണണം എന്നും ഇവിടെ വരുന്നതിനു മുന്പ് മുംബൈയിൽ താമസിക്കണം എന്നായിരുന്നു ആഗ്രഹം എന്നും യുവതി വെളിപ്പെടുത്തി.
ജോലിക്കായി ഹൈദരാബാദിലേക്ക് വന്ന ലീഷ, ഒരു ദിവസം രാത്രി ജോലി കഴിഞ്ഞ് 11 മണിക്ക് വീട്ടിലേക്ക് മടങ്ങവേ താൻ സുരക്ഷിതയായിരുന്നുവെന്നും, മറ്റുള്ളവർക്ക് പ്രശ്നങ്ങൾ നേരിടുന്നതുപോലെ തനിക്കു ഒന്നും സംഭവിച്ചില്ലെന്നും, ഹൈദരാബാദ് വളരെ സുരക്ഷിതമായ നഗരമാണെന്നും യുവതി പറഞ്ഞു.
ഹൈദരാബാദിൽ വളരെ നല്ല മനുഷ്യരാണെന്നും, മികച്ച അടിസ്ഥാന സൗകര്യങ്ങളുമാണ് നഗരം വാഗ്ദാനം ചെയ്യുന്നതെന്നും, രാത്രിയിൽ സുരക്ഷിതയായിരുന്നുവെന്നും, താൻ ഇതുവരെ വിചാരിച്ചതുപോലെയായിരുന്നില്ലെന്നും യുവതി വീഡിയോയിൽ പറഞ്ഞു.
രാത്രിയിൽ നാലു കിലോമീറ്റർ ഒറ്റയ്ക്ക് നടന്നപ്പോൾ ഇത്രമാത്രം സുരക്ഷിതമായി മുന്പൊരിക്കലും അനുഭവപ്പെട്ടിട്ടില്ല എന്ന അടികുറപ്പാണ് യുവതി വീഡിയോയ്ക്ക് നല്കിയിരിക്കുന്നത്. സമ്മിശ്രമായ പ്രതികരണങ്ങളാണ് സോഷ്യൽ മീഡിയയിൽ ഈ വീഡിയോയ്ക്ക് താഴെ പ്രത്യക്ഷപ്പെട്ടത്. പലരും നന്ദി രേഖപ്പെടുത്തികൊണ്ടും ഹൈദരാബാദ് നഗരത്തെ പ്രസംശിച്ചുകൊണ്ടും രംഗത്തെത്തി.
