കൂത്തുപറമ്പ്: മാങ്ങാട്ടിടത്തെ ഗൃഹനാഥൻ പുത്തൻപുര രാജന്‍റെ കൊലപാതക കേസിൽ ചോദ്യം ചെയ്യാൻ കസ്റ്റഡിയിൽ വാങ്ങിയ കുറ്റാരോപിതനെ ക്രൈം ബ്രാഞ്ച് നാളെ തിരികെ കോടതിയിൽ ഹാജരാക്കും.കേസിൽ ഈയാളുടെ മകൻ അനൂപിനെ ഈ മാസം മൂന്നിനാണ് എട്ടു ദിവസത്തേക്ക് കൂത്തുപറമ്പ് ജുഡീഷൽ ഒന്നാം ക്ലാസ് മജിസ്ട്രേട്ടു കോടതി കണ്ണൂർ ക്രൈം ബ്രാഞ്ച് ഡിറ്റക്ടീവ് സംഘത്തിന് കസ്റ്റഡിയിൽ വിട്ടുകൊടുത്തത്.
ഇതേ തുടർന്ന് കഴിഞ്ഞ ദിവസം അന്വേഷണ സംഘം അനൂപുമായി കൊല്ലപ്പെട്ട രാജന്‍റെ വീട്ടിലും രാജന്‍റെ മൃതദേഹം കണ്ടെത്തിയ വീടിനു സമീപം കശുമാവിൻ തോട്ടത്തിലും തെളിവെടുപ്പ് നടത്തി. ഇയാൾ നൽകിയ മൊഴി സംബന്ധിച്ച് വ്യക്തത വരുത്താനാണ് സ്ഥലത്തെത്തിച്ചത്. അതേ സമയം, തെളിവെടുപ്പിൽ കേസിന് ബലമേകുന്ന നിർണായക തെളിവുകൾ പോലീസിന് ലഭിച്ചതായാണ് വിവരം.
അനുപിന് കുറ്റകൃത്യം നടത്താൻ മറ്റാരുടേയെങ്കിലും സഹായം ലഭിച്ചിട്ടുണ്ടോ എന്ന കാര്യം പരിശോധിച്ചു വരികയാണെന്നും ഇതു സംബന്ധിച്ച ചില സൂചനകൾ ലഭിച്ചിട്ടുണ്ടെന്നും ക്രൈംബ്രാഞ്ച് ഇൻസ്പെക്ടർ ബി.സുനുകുമാർ പറഞ്ഞു. 2012 ഫിബ്രവരി 22 ന് നടന്ന രാജന്‍റെ ദുരൂഹ മരണം കൊലപാതകമാണെന്ന് തെളിഞ്ഞതോടെയാണ് അനൂപിനെ പോലീസ് അറസ്റ്റു ചെയ്തത്.
