കൊച്ചി: മഞ്ഞുമ്മല് ബോയ്സ് സിനിമയുമായി ബന്ധപ്പെട്ട സാമ്പത്തിക തട്ടിപ്പു കേസില് ക്രൈംബ്രാഞ്ച് കുറ്റപത്രം സമര്പ്പിച്ചു. 1000 പേജുള്ള കുറ്റപത്രമാണ് എറണാകുളം പ്രിന്സിപ്പല് സെഷന്സ് കോടതിയില് സമര്പ്പിച്ചത്. നടന് സൗബിന് ഷാഹിര്, പിതാവ് ബാബു ഷാഹിര്, ഷോണ് ആന്റണി എന്നിവരാണ് പ്രതികള്.
സിനിമയുടെ ലാഭവിഹിതത്തില് 40% നല്കാമെന്ന് പറഞ്ഞ് ഏഴു കോടി രൂപ തട്ടിയെടുത്തു എന്ന അരൂര് സ്വദേശി സിറാജ് വലിയവീട്ടില് ഹമീദ് നല്കിയ പരാതിയിലാണ് ക്രൈംബ്രാഞ്ച് കുറ്റപത്രം സമര്പ്പിച്ചത്. സിറാജിന്റെ പരാതിയില് മരട് പോലീസ് ആയിരുന്നു കേസ് എടുത്തത്.
2024ല് ആണ് സിനിമ പുറത്തിറങ്ങിയത്. 200 കോടിക്ക് മുകളില് കളക്ഷന് നേടിയ സിനിമ വലിയ ലാഭം നേടിയിരുന്നു. എന്നാല് മുടക്കുമുതലോ ലാഭവിഹിതമോ സിറാജിന് നല്കിയിരുന്നില്ല. ഇതിനെ തുടര്ന്നാണ് സിറാജ് പരാതി നല്കിയത്.
വിശ്വാസവഞ്ചന, ഗൂഢാലോചന, ചതി എന്നീ കുറ്റങ്ങളാണ് പ്രതികള്ക്കെതിരെ ചുമത്തിയിട്ടുള്ളത്. നേരത്തെ സാമ്പത്തിക തട്ടിപ്പു കേസ് റദ്ദാക്കണമെന്ന നിര്മ്മാതാക്കളുടെ അപ്പീല് സുപ്രീംകോടതി തള്ളിയിരുന്നു. കേസ് റദ്ദാക്കണമെന്ന ഹര്ജി നേരത്തെ ഹൈക്കോടതിയും തള്ളിയിരുന്നു.
