കൊച്ചി: യാത്രക്കാരുടെ എണ്ണത്തിലുണ്ടായ സ്ഥിരമായ വര്ധനവും ഉയര്ന്നുവരുന്ന ആവശ്യവും പരിഗണിച്ച് കൊച്ചി മെട്രോ ട്രെയിന് സര്വീസ് രാത്രി 11 വരെ സര്വീസ് നീട്ടി.
നാളെ മുതല് പുതുക്കിയ സമയക്രമം നിലവില് വരും. ഇതനുസരിച്ച് ആലുവ, തൃപ്പൂണിത്തുറ എന്നീ ടെര്മിനല് സ്റ്റേഷനുകളില് നിന്ന് അവസാന സര്വീസ് രാത്രി 11ന് പുറപ്പെടും. ആലുവ മഹാദേവ ക്ഷേത്രത്തിലെ ശിവരാത്രി മഹോത്സവത്തോടനുബന്ധിച്ച് പ്രത്യേക സര്വീസുകളും നടത്തും.
നാളെ തൃപ്പൂണിത്തുറ ടെര്മിനലില് നിന്ന് അവസാന സര്വീസ് രാത്രി 11.30ന് പുറപ്പെടും. 16 ന്– ആലുവ മെട്രോ സ്റ്റേഷനില് നിന്ന് പുലര്ച്ചെ നാലിന് സര്വീസ് ആരംഭിക്കും. രാവിലെ ആറുവരെ 30 മിനിറ്റ് ഇടവേളയില് പ്രത്യേക സര്വീസ് ഉണ്ടായിരിക്കും. തുടര്ന്ന് ട്രെയിനുകള് പതിവ് ടൈംടേബിള് പ്രകാരം സര്വീസ് നടത്തും.
