കോട്ടയം: കോട്ടയം നഗരസഭയുടെ പ്രധാന കവാടത്തിനു മുന്നിലുള്ള കെട്ടിടത്തിൽ വരച്ചിരുന്ന ചുവർ ചിത്രങ്ങൾ പെയിന്‍റടിച്ചു മായ്ച്ചു കളഞ്ഞ സംഭവത്തിൽ വിവിധ കോണുകളിൽ നിന്നും പ്രതിഷേധമുയരുന്നു. വർഷങ്ങൾക്കു മുന്പാണു ലളിതകലാ അക്കാദമിയുടെ നേതൃത്വത്തിൽ നിരവധി കലാകാരൻമാർ ചേർന്നാണ് കോട്ടയം നഗരത്തെ ചുവർ ചിത്രനഗരിയാക്കി മാറ്റിയത്.
ഈ ചിത്രകാരൻമാർ നഗരസഭയുടെ കവാടത്തിനു മുന്നിലുള്ള കെട്ടിടത്തിൽ വരച്ച ചിത്രങ്ങളാണു നവീകരണത്തിന്‍റെ പേരിൽ നഗരസഭ പെയിന്‍റടിച്ചു മായ്ച്ചു കളഞ്ഞത്. ഇതോടെയാണു ചുവർ ചിത്രങ്ങൾ സംരക്ഷിക്കേണ്ടതാണെന്നും അതിനു ഉത്തരവാദിത്വത്തപ്പെട്ടവർ തന്നെ ചിത്രങ്ങൾ നശിപ്പിച്ചു കളഞ്ഞുവെന്നുമുള്ള ആരോപണമുയർന്നത്.
തിരുനക്കര മൈതാനത്ത് നവീകരണ പ്രവർത്തനങ്ങൾ നടത്തിയപ്പോൾ അവിടെ വരച്ചിരുന്ന ചുവർചിത്രങ്ങളും വെള്ളപൂശി നശിപ്പിച്ചിരുന്നു. അതേസമയം വർഷങ്ങൾ പഴക്കമുള്ള ചുവർചിത്രങ്ങൾ മഴയും വെയിലുമേറ്റ് പൂർണമായും നശിച്ചുപോയിരുന്നുവെന്നും ചിത്രങ്ങൾ പഴയതു പോലെ നിലനിർത്താൻ സാധിക്കാത്തതിനാലാണു കെട്ടിടം പെയിന്‍റടിച്ചു മനോഹരമാക്കുന്നതിനൊപ്പം ചുവർ ചിത്രങ്ങളുണ്ടായിരുന്ന ഭാഗങ്ങളിലും പെയിന്‍റ് അടിച്ചതെന്നു നഗരസഭ ചെയർപേഴ്സണ്‍ ഡോ. പി.ആർ. സോന പറഞ്ഞു.
