രാജ്യത്ത് ആദ്യമായി ഒരു ചിത്രകാരിയുടെ പെയിന്റിംഗ് പൂര്ണമായി വിമാനത്തില് പകര്ത്തി എയര് ഇന്ത്യ എക്സ്പ്രസ്. കൊച്ചി ബിനാലെയിൽ മ്യൂറല് വിഭാഗത്തില് പങ്കെടുക്കുന്ന തമിഴ്നാട്ടുകാരിയായ ഓഷീന് ശിവയുടെ ഗ്രാഫിറ്റി പെയിന്റിംഗാണ് എയര് ഇന്ത്യ എക്സ്പ്രസിന്റെ പുതിയ ബോയിംഗ് വിമാനത്തിലുള്ളത്. വിമാനംതന്നെ ചിത്രകലയ്ക്കുളള കാന്വാസാക്കി മാറിയതോടെ ഈ വിമാനത്തിന് ഫ്ലൈയിംഗ് കാന്വാസ് എന്നാണു പേരിട്ടിരിക്കുന്നത്.
രാജ്യത്ത് ആദ്യമായി ഇത്തരത്തില് ഒരു വിമാനം പെയിന്റ് ചെയ്യുന്ന വിമാന കമ്പനിയും എയര് ഇന്ത്യ എക്സ്പ്രസാണ്. മറ്റു വിമാനകമ്പനികളില്നിന്ന് വ്യത്യസ്തമായി എയര് ഇന്ത്യ എക്സ്പ്രസിന്റെ ഓരോ വിമാനത്തിനും വെവ്വേറെ പുറം ഡിസൈനുകളാണുള്ളത്.
രാജാ രവിവര്മയുടെ ചിത്രങ്ങള് മുതല് ദേശീയ പൈതൃക സ്മാരകങ്ങള്, കഥകളി, കഥക്, ഭാരതനാട്യം പോലുള്ള ശാസ്ത്രീയ കലാരൂപങ്ങള് എന്നിവയും എയര് ഇന്ത്യ എക്സ്പ്രസ് വിമാനങ്ങളില് ടെയില് ആര്ട്ടായുണ്ടെന്ന് അധികൃതർ പറഞ്ഞു.
