ചെറുതോണി: പ്രായപൂർത്തിയാകാത്ത പട്ടികജാതിക്കാരിയായ പെണ്‍കുട്ടിയെ പീഡിപ്പിച്ച യുവാവിനെ പോലീസ് അറസ്റ്റുചെയ്തു. ഇടുക്കിയിൽ ഓട്ടോറിക്ഷ ഡ്രൈവറായ നായരുപാറ സ്വദേശി പറയരുകുന്നേൽ പ്രിൻസ് (21)നെയാണ് പോലീസ് അറസ്റ്റുചെയ്തത്.പ്ലസ് വണ്‍ വിദ്യാർഥിനിയുടെ ബന്ധുവിന്‍റെ വീടിന്‍റെ അയൽവാസിയായ പ്രതി ഭീഷണിപ്പെടുത്തി ബലമായി പീഡിപ്പിക്കുകയായിരുന്നുവെന്ന് പോലീസ് പറഞ്ഞു.
കഴിഞ്ഞദിവസം ദേഹാസ്വാസ്ഥ്യം അനുഭവപ്പെട്ട പെണ്‍കുട്ടി മാതാവിനൊപ്പം മുരിക്കാശേരി പോലീസ് സ്റ്റേഷനിലെത്തി പരാതി നൽകുകയായിരുന്നു. ഇടുക്കി സിഐ സിബച്ചൻ ജോസഫിന്റെ നേതൃത്വത്തിലുള്ള പോലീസാണ് പ്രതിയെ അറസ്റ്റുചെയ്തത്.പ്രതിയെ കോടതിയിൽ ഹാജരാക്കി റിമാൻഡചെയ്തു.
