തിരുവനന്തപുരം: പിഎസ്‌സി അംഗങ്ങളുടെ നിയമനച്ചട്ടങ്ങളിൽ ഭേദഗതി വരുത്താൻ നീക്കം. ഇതു സംബന്ധിച്ച് പൊതുഭരണ സെക്രട്ടറി മുഖ്യമന്ത്രിക്ക് റിപ്പോർട്ട് നൽകി. അംഗങ്ങളുടെ അടിസ്ഥാന വിദ്യാഭ്യാസ യോഗ്യത ബിരുദമാക്കണമെന്നാണ് റിപ്പോർട്ടിലെ പ്രധാന നിർദേശം. നിലവിൽ പിഎസ്‌സി അംഗങ്ങൾക്ക് പ്രത്യേക വിദ്യാഭ്യാസ യോഗ്യത നിശ്ചയിച്ചിട്ടില്ല.
ഈ സാഹചര്യത്തിലാണ് നിയമന മാനദണ്ഡങ്ങളിൽ മാറ്റം വരുത്താൻ ശിപാർശ ചെയ്തിരിക്കുന്നത്. സുപ്രീംകോടതി ഉത്തരവിന്‍റെ അടിസ്ഥാനത്തിലാണ് റിപ്പോർട്ട് സമർപ്പിച്ചതെന്നാണ് സൂചന. പിഎസ്‌സി അംഗങ്ങളെ തെരഞ്ഞെടുക്കുന്നതിന് പ്രത്യേക അഭിമുഖ ബോർഡ് രൂപീകരിക്കണമെന്നും അപേക്ഷകരുടെ യോഗ്യതയും പ്രവൃത്തിപരിചയവും വിശദമായി പരിശോധിക്കണമെന്നും റിപ്പോർട്ടിൽ നിർദേശിക്കുന്നു.
കൂടാതെ കമ്മീഷനിലെ അംഗങ്ങളുടെ എണ്ണം പരിമിതപ്പെടുത്തണം. പൊതുപ്രവർത്തകരെ പിഎസ്‌സി അംഗങ്ങളായി നിയമിക്കുന്നതിന് വ്യക്തമായ മാനദണ്ഡങ്ങളും കൊണ്ടുവരണം. നിയമനപ്രക്രിയ കൂടുതൽ കൃത്യവും സുതാര്യവുമാക്കുകയാണ് നിർദേശങ്ങളുടെ ലക്ഷ്യം. ശിപാർശകൾ സർക്കാർ അംഗീകരിച്ചാൽ പിഎസ്‌സി അംഗങ്ങളുടെ നിയമനരീതിയിലും യോഗ്യതാ മാനദണ്ഡങ്ങളിലും മാറ്റമുണ്ടാകും.
