ഗുവാഹാട്ടി: ലോക ജൂനിയര്‍ അത്ലറ്റിക് മീറ്റില്‍ സ്വര്‍ണം നേടി ചരിത്രം കുറിച്ച ഹിമ ദാസിന്റെ പരിശീലകനായ നിപ്പോണ്‍ ദാസിനെതിരെ ലൈംഗിക ആരോപണം. ഗുവാഹാട്ടിയില്‍ നിപ്പോണിന് കീഴില്‍ പരിശീലനം നടത്തുന്ന ഒരു അത്ലറ്റാണ് നിപ്പോണ്‍ തന്നെ പീഡിപ്പിച്ചെന്ന് ആരോപിച്ച് രംഗത്ത് വന്നിരിക്കുന്നത്.
ഗുവാഹാട്ടി ഇന്ദിരാ ഗാന്ധി അത്ലറ്റിക് സ്റ്റേഡിയത്തില്‍ പരിശീലനം നടത്തവെയാണ് നിപ്പോണ്‍ തന്നെ ലൈംഗികമായി പീഡിപ്പിച്ചതെന്ന് അത്ലറ്റ് പോലീസിന് നല്‍കിയ പരാതിയില്‍ ഇവര്‍ പറയുന്നു. മെയ് മാസം പകുതിയോടെയായിരുന്നു സംഭവം. തുടര്‍ന്ന് ജൂണ്‍ 22-നാണ് പോലീസില്‍ പരാതി നല്‍കിയത്. ഈ പരാതിയില്‍ ഗുവാഹാട്ടി പോലീസ് നിപ്പോണിനെതിരെ എഫ്.ഐ.ആര്‍ രജിസ്റ്റര്‍ ചെയ്തിട്ടുണ്ട്.
എന്നാല്‍ പെണ്‍കുട്ടിയുടെ ആരോപണം തള്ളിക്കളഞ്ഞ് നിപ്പോണ്‍ രംഗത്തെത്തി. താന്‍ നിരപരാധിയാണെന്നും പെണ്‍കുട്ടി കള്ളം പറയുകയാണെന്നും നിപ്പോണ്‍ പ്രതികരിച്ചു. ‘ഈ പെണ്‍കുട്ടി 100 മീറ്ററിലും 200 മീറ്ററിലുമാണ് പരിശീലനം നടത്തുന്നത്.
ദേശീയ ചാമ്പ്യന്‍ഷിപ്പിനുള്ള അസം സംസ്ഥാന ടീമില്‍ ഇടം നേടാന്‍ ഇവര്‍ ശ്രമിച്ചിരുന്നു. പലപ്പോഴും അവസരം നല്‍കണമെന്ന് എന്നോട് ആവശ്യപ്പെട്ടിട്ടുണ്ട്. എന്നാല്‍ അവരേക്കാള്‍ മികച്ച പ്രകടനം പുറത്തെടുക്കുന്ന അത്ലറ്റുകളുള്ളതിനാല്‍ എനിക്ക് അവരെ സംസ്ഥാന ടീമില്‍ ഉള്‍പ്പെടുത്താന്‍ സാധിച്ചില്ല.
ഇതിനെ തുടര്‍ന്നാണ് എനിക്കെതിരെ ഇങ്ങനെയൊരു പരാതി നല്‍കിയതെന്ന് നിപ്പോണ്‍ വ്യക്തമാക്കി. അന്വേഷണത്തില്‍ താന്‍ കുറ്റക്കാരനല്ലെന്ന് തെളിയുമെന്നും നിപ്പോണ്‍ കൂട്ടിച്ചേര്‍ത്തു. നിപ്പോണിനെ ഇതുവരെ പോലീസ് അറസ്റ്റ് ചെയ്തിട്ടില്ല. ഒരു തവണ പോലീസ് സ്റ്റേഷനിലേക്ക് വിളിച്ചുവരുത്തി ചോദ്യം ചെയ്തു. എന്തെങ്കിലും തെറ്റ് ചെയ്തിട്ടുണ്ടെങ്കില്‍ ശിക്ഷ ഏറ്റുവാങ്ങാന്‍ തയ്യാറാണെന്നും നിപ്പോണ്‍ വ്യക്തമാക്കി.
