മൊഹാലിയിൽ വീടിന്‍റെ അടുക്കളയിലുണ്ടായ തീപിടിത്തത്തിൽ പരിഭ്രാന്തയായി നിന്ന വനിതാ ഡോക്ടർക്ക് രക്ഷകനായി ഡെലിവറി ജീവനക്കാരൻ. കൊറിയർ ഡെലിവറി ചെയ്യാൻ എത്തിയതായിരുന്നു ഈ യുവാവ്. സമയബന്ധിതമായി ഇടപെട്ട് വലിയൊരു ദുരന്തമാണ് ഇദ്ദേഹം ഒഴിവാക്കിയത്.
മൊഹാലിയിലെ ഡോ. ശിവാങ്കി ജോഷിയുടെ വീട്ടിലാണ് സംഭവം. ഡെലിവറി വാങ്ങാൻ ഡോക്ടർ വാതിലിലേക്ക് പോയ സമയത്ത്, അടുക്കളയിലെ സ്റ്റൗവിൽ വെച്ചിരുന്ന പാനിൽ നിന്ന് പുക ഉയരുകയും പെട്ടെന്ന് തീ ആളിപ്പടരുകയും ചെയ്തു.
അടുക്കളയിലെ തീ കണ്ട് എന്ത് ചെയ്യണമെന്നറിയാതെ ഡോക്ടർ പകച്ചുനിൽക്കുകയായിരുന്നു. ഈ സമയം ഡെലിവറി പാക്കറ്റുമായി അവിടെയെത്തിയ ജീവനക്കാരൻ സാഹചര്യം മനസ്സിലാക്കി ഉടൻ തന്നെ അടുക്കളയിലേക്ക് ഓടിയെത്തി.
തീയണക്കാൻ ശ്രമിച്ച ഇദ്ദേഹം ഉടൻ തന്നെ ഗ്യാസ് സപ്ലൈ ഓഫ് ചെയ്യുകയും ചെയ്തു. ഇതോടെ തീ പടരുന്നത് തടയാൻ കഴിഞ്ഞു.
ഈ സംഭവത്തിന്‍റെ സിസിടിവി ദൃശ്യങ്ങൾ ഡോ. ശിവാങ്കി ജോഷി സമൂഹമാധ്യമങ്ങളിൽ പങ്കുവെച്ചിട്ടുണ്ട്. “ചിലർ പാഴ്സലുകൾ ഡെലിവറി ചെയ്യുമ്പോൾ, മറ്റുചിലർ ആവശ്യഘട്ടത്തിൽ പ്രതീക്ഷ ഡെലിവറി ചെയ്യുന്നു” എന്ന് കുറിച്ചുകൊണ്ടാണ് അവർ ഈ യുവാവിന്റെ നിസ്വാർത്ഥ സേവനത്തെ പ്രശംസിച്ചത്. ഏഴ് ദശലക്ഷത്തിലധികം ആളുകളാണ് ഈ വീഡിയോ ഇതിനോടകം കണ്ടത്.
