ഗുജറാത്തിലെ ഗിർനാർ വനത്തിന് സമീപമുള്ള ആശ്രമത്തിന് മുന്നിൽ ഇരുന്ന ആളുകളുടെ കൺമുന്നിൽ വെച്ച് പുള്ളിപ്പുലി നായയെ പിടികൂടി കൊണ്ടുപോയി. ഗുജറാത്തിലെ ജുനാഗഡിലുള്ള പ്രേണധാം ആശ്രമത്തിന് പുറത്താണ് ഈ ഞെട്ടിക്കുന്ന സംഭവം നടന്നത്. ആശ്രമത്തിന് മുന്നിൽ ആളുകൾ സംസാരിച്ചിരിക്കുമ്പോഴാണ് തൊട്ടടുത്തേക്ക് പുലിയെത്തിയത്.
ആശ്രമത്തിന്‍റെ കവാടത്തിനടുത്തുള്ള ഓഫീസിന് മുന്നിൽ നായ നിൽക്കുന്ന സ്ഥലത്തേക്ക് പുള്ളിപ്പുലി നിശബ്ദമായി എത്തുന്നതും, യാതൊരു മുന്നറിയിപ്പും നൽകാതെ ഒറ്റയടിക്ക് നായയെ കഴുത്തിന് പിടിച്ച് വനത്തിലേക്ക് കൊണ്ടുപോകുന്നതും സിസിടിവി ദൃശ്യങ്ങളിൽ വ്യക്തമാണ്.
ഈ സംഭവത്തിന്‍റെ ഏറ്റവും ഭയപ്പെടുത്തുന്ന വസ്തുത, ആക്രമണം നടക്കുന്നതിന്‍റെ തൊട്ടടുത്ത ബെഞ്ചിൽ മൂന്ന് പേർ മൊബൈൽ ഫോണിൽ മുഴുകിയിരിക്കുന്നുണ്ടായിരുന്നു എന്നതാണ്. മറ്റ് ചിലർ സമീപത്തായി സംസാരിച്ചു നിൽക്കുന്നുമുണ്ടായിരുന്നു. പുള്ളിപ്പുലി വന്ന് പോയത് വളരെ പെട്ടെന്നായതിനാൽ ആളുകൾക്ക് പ്രതികരിക്കാൻ പോലും സമയം ലഭിച്ചില്ല.
കഴിഞ്ഞ ദിവസം വൈകുന്നേരം 7:30 ഓടെയാണ് സംഭവം നടന്നതെന്ന് ആശ്രമത്തിലെ കാര്യസ്ഥനായ രാജ്ഭായ് പറഞ്ഞു. എന്നാൽ എന്താണ് സംഭവിച്ചതെന്ന് ആദ്യം അവിടെയുണ്ടായിരുന്നവർക്ക് മനസിലായിരുന്നില്ല. പിന്നീട് സിസിടിവി ദൃശ്യങ്ങൾ പരിശോധിച്ചപ്പോഴാണ് പുലിയുടെ ആക്രമണത്തെക്കുറിച്ച് വ്യക്തമായത്.
ഗിർനാർ വനത്തോട് ചേർന്നു സ്ഥിതി ചെയ്യുന്ന ഇവിടെ സിംഹങ്ങളെയും പുള്ളിപ്പുലികളെയും കാണാറുണ്ടെങ്കിലും, ആളുകൾ സജീവമായിരിക്കുന്ന സായാഹ്ന സമയത്ത് പുലി എത്തിപ്പെട്ടത് ആശ്രമവാസികളിൽ വലിയ ആശങ്കയാണ് ഉണ്ടാക്കിയിരിക്കുന്നത്.
