ബംഗളൂരുവിൽ ഓട്ടോറിക്ഷയ്ക്ക് പകരം റാപ്പിഡോ ബൈക്ക് ടാക്സി തിരഞ്ഞെടുത്തതിന് യാത്രികന് നേരെ ഓട്ടോ ഡ്രൈവറുടെ ആക്രമണം. ബൈക്ക് ടാക്സി പിന്തുടർന്ന് ഓടയ്ക്കൽ ഓട്ടോ ഡ്രൈവർ യാത്രികന്‍റെ കൈപിടിച്ച് വലിക്കുകയും വാഹനം മറിച്ച് താഴെയിടാൻ ശ്രമിക്കുകയും ചെയ്തുവെന്നാണ് പരാതി. റെഡ്ഡിറ്റിലൂടെയാണ് യാത്രക്കാരൻ ഈ ഭീകരമായ അനുഭവം പങ്കുവെച്ചത്.
ചെറിയൊരു ദൂരത്തേക്ക് (2-3 കിലോമീറ്റർ) ഓട്ടോ ഡ്രൈവർമാർ 120 രൂപ ആവശ്യപ്പെട്ടതിനെത്തുടർന്നാണ് യാത്രക്കാരൻ ബൈക്ക് ടാക്സി ബുക്ക് ചെയ്തത്. ഈ ചെറിയ യാത്രയ്ക്ക് ഇത്രയും ഉയർന്ന തുക നൽകാൻ തയ്യാറാകാതെ റാപ്പിഡോ ബുക്ക് ചെയ്തതാണ് ഓട്ടോ ഡ്രൈവറെ പ്രകോപിപ്പിച്ചത്.
ബൈക്ക് മുന്നോട്ട് നീങ്ങുന്നതിനിടയിൽ ഓട്ടോറിക്ഷയിൽ പിന്തുടർന്നെത്തിയ ഡ്രൈവർ യാത്രികന്‍റെ കൈപിടിച്ച് വലിച്ച് താഴെയിടാൻ ശ്രമിക്കുകയായിരുന്നു എന്ന് റെഡ്ഡിറ്റ് പോസ്റ്റിൽ പറയുന്നു. ഓടിക്കൊണ്ടിരുന്ന ബൈക്കിൽ നിന്ന് താഴെ വീണിരുന്നെങ്കിൽ ജീവന് തന്നെ ആപത്തുണ്ടാകുമായിരുന്നു എന്ന് യാത്രക്കാരൻ വ്യക്തമാക്കുന്നു. വർഷങ്ങളായി ബംഗളൂരുവിൽ താമസിക്കുന്ന താൻ ഇത്തരത്തിലുള്ള ഒരു അനുഭവം ഇതുവരെ നേരിട്ടിട്ടില്ലെന്നും അദ്ദേഹം പറഞ്ഞു.
സമൂഹമാധ്യമങ്ങളിൽ വലിയ ചർച്ചയായ ഈ സംഭവത്തിൽ നിരവധി പേരാണ് പ്രതികരിച്ചത്. ഓട്ടോ ഡ്രൈവറുടെ വാഹനം തിരിച്ചറിയാൻ സഹായിക്കുന്ന നമ്പറും തെളിവുകളും സഹിതം പൊലീസിൽ പരാതി നൽകണമെന്ന് ഉപയോക്താക്കൾ നിർദ്ദേശിച്ചു. ഇത് കൊലപാതകശ്രമത്തിന് തുല്യമാണെന്നും മറ്റുള്ളവരുടെ സുരക്ഷ മുൻനിർത്തി കർശന നടപടി സ്വീകരിക്കണമെന്നും പലരും ആവശ്യപ്പെട്ടു.
