ഇന്ത്യൻ ഫുട്ബോൾ ലീഗിന്‍റെ ട്രോഫി തമാശയായി എടുത്തുകൊണ്ട് പോകാൻ ശ്രമിക്കുന്ന നാഗാലാൻഡ് മന്ത്രി തംജെൻ ഇംന അലോങ്ങിന്‍റെ (Temjen Imna Along) വീഡിയോ സമൂഹമാധ്യമങ്ങളിൽ തരംഗമാകുന്നു. വലിയൊരു കപ്പ് ആരാധകരെയും കാണികളെയും ചിരിപ്പിച്ചു കൊണ്ട് സ്വന്തമാക്കാൻ നോക്കുന്ന മന്ത്രിയുടെ ലളിതമായ പ്രവൃത്തി ഇതിനോടകം തന്നെ നിരവധി പേരുടെ ശ്രദ്ധ നേടിയിട്ടുണ്ട്.
ഉന്നത വിദ്യാഭ്യാസം, ടൂറിസം വകുപ്പ് മന്ത്രിയായ അലോങ് തന്നെയാണ് തന്‍റെ ഔദ്യോഗിക ഇൻസ്റ്റാഗ്രാം അക്കൗണ്ടിലൂടെ ഈ വീഡിയോ പങ്കുവെച്ചത്. ഒരു പൊതുചടങ്ങിനിടയിലാണ് രസകരമായ ഈ സംഭവമുണ്ടായത്.
വേദിയിൽ ട്രോഫിക്ക് അരികിൽ നിന്ന് ക്യാമറയ്ക്ക് നേരെ പുഞ്ചിരിച്ച് കൈവീശുന്ന മന്ത്രി, പെട്ടെന്ന് ആ വലിയ വെള്ളി ട്രോഫി കൈയിലെടുത്ത് അവിടെനിന്നും നടന്നുനീങ്ങുന്നതായി ഭാവിക്കുകയായിരുന്നു. എന്നാൽ കുറേദൂരം പോയതിന് ശേഷം അദ്ദേഹം ചിരിച്ചുകൊണ്ട് ട്രോഫി തിരികെ വെക്കുകയും ക്യാമറയ്ക്ക് മുന്നിൽ ഫോട്ടോയ്ക്ക് പോസ് ചെയ്യുകയും ചെയ്തു.
“ടീമിന്‍റെ ജേഴ്സി എന്‍റെ സൈസിൽ ലഭ്യമല്ലാത്തതുകൊണ്ട് ഞാൻ ഒരു വെള്ള ഷർട്ടിലാണ് ചടങ്ങിനെത്തിയത്” എന്ന രസകരമായ അടിക്കുറിപ്പോടെയാണ് മന്ത്രി വീഡിയോ പങ്കുവെച്ചത്. നാഗാലാൻഡ് യുണൈറ്റഡ് ടീമിന് പിന്തുണയറിയിച്ച അദ്ദേഹം, ട്രോഫി കാണാൻ മാത്രമല്ല അടുത്ത തവണ അത് സ്വന്തമാക്കി വീട്ടിലെത്തിക്കാൻ ടീമിന് സാധിക്കട്ടെയെന്നും ആശംസിച്ചു.
മന്ത്രിയുടെ ഈ തമാശരൂപത്തിലുള്ള പ്രവൃത്തിക്ക് സമൂഹമാധ്യമങ്ങളിൽ മികച്ച പ്രതികരണമാണ് ലഭിക്കുന്നത്. കായികരംഗത്തെ പ്രോത്സാഹിപ്പിക്കാൻ ഇത്തരം നേതാക്കൾ മുന്നോട്ടുവരുന്നത് സന്തോഷകരമാണെന്ന് ഒരു ഉപയോക്താവ് അഭിപ്രായപ്പെട്ടു. മന്ത്രി ട്രോഫി എടുത്തപ്പോൾ ആദ്യം തന്‍റെ വാട്ടർ ബോട്ടിലാണ് എടുത്തതെന്ന് കരുതിപ്പോയെന്നും, 16 കിലോ ഭാരമുള്ള ആ ട്രോഫി അദ്ദേഹം എടുത്തത് കണ്ടപ്പോൾ കൈ വേദനിച്ചേക്കുമെന്ന് ആശങ്കപ്പെട്ടുവെന്നും മറ്റുള്ളവർ തമാശരൂപേണ കമന്‍റ് ചെയ്തു.
