യുകെയിലെ ഗ്ലോസ്റ്റർഷെയറിൽ വിമാനത്തിന്‍റെ ചിറകിനു മുകളിൽ കെട്ടിയിട്ട് സാഹസികമായി പറന്ന് ചരിത്രം സൃഷ്ടിച്ചിരിക്കുകയാണ് 99കാരിയായ ഹെൽഗ ഡഫി. ഇതോടെ ലോകത്തിലെ ഏറ്റവും പ്രായം കൂടിയ ‘വിംഗ് വാക്കർ’ എന്ന ഗിന്നസ് ലോക റിക്കാർഡും ഹെൽഗ സ്വന്തമാക്കി.
വില്ലറ്റ്ഷെയറിലെ ഡെവൈസസിലുള്ള കെയർ ഹോമിൽ കഴിയുന്ന ഹെൽഗ, 97-ാം വയസിൽ വിംഗ് വാക്കിംഗ് നടത്തിയ ബെറ്റി ബ്രോമേജ് എന്ന സ്ത്രീയെക്കുറിച്ച് വാർത്തകളിൽ കണ്ടതിന് ശേഷമാണ് ഈ സാഹസിക ദൗത്യം ഏറ്റെടുക്കാൻ തീരുമാനിച്ചത്. റെൻകോംബ് എയർഫീൽഡിൽ നടന്ന ഈ പറക്കലിൽ തനിക്ക് യാതൊരുവിധ ഭയവും തോന്നിയില്ലെന്നും, പകരം വലിയ ആവേശമാണ് അനുഭവപ്പെട്ടതെന്നും ഹെൽഗ പറഞ്ഞു.
ഈ അപൂർവ്വ നേട്ടത്തോടൊപ്പം ‘വില്ലറ്റ്ഷെയർ ആന്‍റ് ബാത്ത് എയർ ആംബുലൻസ്’ (Wiltshire and Bath Air Ambulance) ചാരിറ്റി സംഘടനയ്ക്കായി 1,300 പൗണ്ടിലധികം (ഏകദേശം 1.4 ലക്ഷം രൂപ) സമാഹരിക്കാനും ഹെൽഗയ്ക്ക് സാധിച്ചു. ഹെൽഗയുടെ സഹോദരിയുടെ അവസാന യാത്രയിൽ ഈ എയർ ആംബുലൻസ് സേവനം ലഭിച്ചിരുന്നതിനാൽ ഈ ധനസമാഹരണം കുടുംബത്തിന് വലിയ വൈകാരിക പ്രാധാന്യമുള്ളതായിരുന്നു.
ഏഴ് മക്കളിൽ മൂത്തവളായ ഹെൽഗയുടെ ഈ ധീരമായ തീരുമാനത്തിൽ അന്തരിച്ച പിതാവ് ഏറെ അഭിമാനിക്കുമായിരുന്നു എന്ന് സഹോദരീ പുത്രിമാർ ഓർത്തെടുത്തു. പറക്കലിന് ശേഷം ഗിന്നസ് വേൾഡ് റിക്കാർഡ്സ് അധികൃതർ ഹെൽഗയ്ക്ക് ഔദ്യോഗിക സർട്ടിഫിക്കറ്റ് കൈമാറി. പ്രായം വെറുമൊരു അക്കം മാത്രമാണെന്നും, സാഹസികതയ്ക്കും ലക്ഷ്യങ്ങൾക്കും മുന്നിൽ പ്രായം ഒരു തടസമല്ലെന്നും ഹെൽഗ തന്‍റെ ജീവിതത്തിലൂടെ തെളിയിച്ചിരിക്കുകയാണ്.
