തായ്‌ലൻഡ് രാജ്ഞി സുതിദ റോയൽ വിമാനം സ്വയം പൈലറ്റ് ചെയ്ത് ജപ്പാനിൽ എത്തി. ഒമ്പത് ദിവസത്തെ ഔദ്യോഗിക സന്ദർശനത്തിനായാണ് രാജ്ഞി വിമാനം നിയന്ത്രിച്ച് ജപ്പാനിലെ ഹൊക്കൈഡോയിൽ എത്തിയത്.
ബാങ്കോക്കിലെ ഡോൺ മുവാങ് മിലിട്ടറി എയർപോർട്ടിൽ നിന്നും പുറപ്പെട്ട ബോയിംഗ് 737 വിമാനം ഒക്ടോബർ 14ന് പ്രാദേശിക സമയം രാവിലെ 10:05ഓടെ ന്യൂ ചിറ്റോസ് എയർപോർട്ടിൽ ലാൻഡ് ചെയ്തു. തുടർന്ന് സപ്പോറോയിലെ ഹോട്ടലിലേക്ക് രാജ്ഞി തന്നെയാണ് കാർ ഓടിച്ചുപോയത്. 2027 ലെ ഇന്‍റർനാഷണൽ ഐസ് ഹോക്കി ഫെഡറേഷൻ വിമൻസ് ഏഷ്യ ചാമ്പ്യൻഷിപ്പിൽ പങ്കെടുക്കാനും കായികതാരങ്ങൾക്ക് മെഡലുകളും ട്രോഫികളും സമ്മാനിക്കാനുമാണ് ഒക്ടോബർ 14 മുതൽ 22 വരെയുള്ള ഈ സന്ദർശനം. ഫെഡറേഷന്‍റെ ആദ്യത്തെ വിമൻസ് ഗ്ലോബൽ അംബാസഡർ എന്ന നിലയിലാണ് ഈ ക്ഷണം.
കഴിഞ്ഞ ഒക്ടോബർ 8ന് ജെഎഎസ് 39സി ഗ്രിപെൻ (JAS 39C Gripen) യുദ്ധവിമാനം തനിയെ പറത്തി രാജ്ഞി വലിയൊരു ചരിത്രനേട്ടം സ്വന്തമാക്കിയിരുന്നു. യുദ്ധവിമാനം പറത്തുന്ന ലോകത്തിലെ ആദ്യത്തെ ഭരണാധികാരിയായ രാജ്ഞിയാണ് സുതിദ. 2019-ൽ രാജാവിനെ വിവാഹം കഴിക്കുന്നതിന് മുമ്പ് തായ് എയർവേയ്‌സിൽ ഫ്ലൈറ്റ് അറ്റൻഡറായി ജോലി ചെയ്തിരുന്ന അവർ, 2010ൽ ഫ്ലൈറ്റ് പരിശീലനം ആരംഭിക്കുകയും ഏകദേശം 1,190 മണിക്കൂറിലധികം പറക്കൽ പരിചയം നേടുകയും ചെയ്തിട്ടുണ്ട്. രാജാവിനൊപ്പം ഔദ്യോഗിക യാത്രകളിൽ കോ-പൈലറ്റായും അവർ സേവനമനുഷ്ഠിച്ചിട്ടുണ്ട്.
