കൊച്ചി: മലയാള ചലച്ചിത്ര ലോകത്തെ സൂപ്പർ ഹിറ്റ് സംവിധായകനും നിർമാതാവുമായ തമ്പി കണ്ണന്താനം(65) അന്തരിച്ചു. രോഗബാധിതനായി കൊച്ചിയിലെ സ്വകാര്യ ആശുപത്രിയിൽ ചികിത്സയിലിരിക്കെ ഇന്ന് ഉച്ചയോടെയാണ് അന്ത്യം സംഭവിച്ചത്.
മോഹന്‍ലാലിനെ സൂപ്പര്‍സ്റ്റാർ പദവിയിലേക്ക് ഉയർത്തിയ രാജാവിന്‍റെ മകൻ അടക്കം പതിനാറോളം ചിത്രങ്ങൾ സംവിധാനം ചെയ്തു. ഇന്ദ്രജാലം, നാടോടി, വഴിയോരക്കാഴ്‌ചകൾ, മാന്ത്രികം, മാസ്മരം തുടങ്ങിവയാണ് പ്രധാനചിത്രങ്ങൾ. മമ്മൂട്ടിയും സുരേഷ് ഗോപിയും, മുകേഷും അടക്കമുള്ളവരും അദ്ദേഹത്തിന്‍റെ സിനിമകളിൽ നായകന്മാരായി അഭിനയിച്ചു.
1953 ഡിസംബർ 13ന് കാഞ്ഞിരപ്പള്ളയിലാണ് ജനനം. 1983 ല്‍ ജോഷി സംവിധാനം നിർവഹിച്ച താവളം എന്ന ചിത്രത്തില്‍ സഹസംവിധായകനായാണ് സിനിമലോകത്തേക്ക് പ്രവേശിക്കുന്നത്. ഇനിയ നായികയായി എത്തിയ ഗേൾസ് എന്ന ബഹുഭാഷാചിത്രമാണ് അദ്ദേഹത്തിന്‍റെ അവസാനചിത്രം.
80-90 കാലഘട്ടങ്ങളിൽ മലയാളചലച്ചിത്രങ്ങളിൽ സജീവമായിരുന്ന തമ്പി കണ്ണന്താനം അഞ്ച് ചിത്രങ്ങൾ നിർമിച്ചു. മൂന്നു ചിത്രങ്ങൾക്ക് തിരക്കഥ എഴുതി. പത്തോളം ചിത്രങ്ങളിൽ അദ്ദേഹം അഭിനയിക്കുകയും ചെയ്തു.
